اناؤ ریپ کیس: یو پی پولیس سے رپورٹ طلب

اترپردیش کے ضلع اناؤ کے بہار علاقے میں ریپ متأثرہ کو زندہ جلائے جانے کی کوشش کے واقعہ کا سخت نوٹس لیتے ہوئے قومی کمیشن برائے خواتین نے یوپی پولیس سے گذشتہ تین سالوں کے اندر ضمانت پر رہا ہونے والے ریپ ملزموں کی رپورٹ طلب کی ہے۔

ڈائرکٹر جنرل آف پولیس او پی سنگھ کو بھیجے گئے اپنے لیٹر میں کمیشن کی چیئر پرسن ریکھا شرما نے کہا کہ ریاست میں خواتین کے خلاف بڑھتے جرائم پر کافی رنجور ہے جبکہ خواتین کے حقوق کے تحفظ کے لئے متعدد قوانین پہلے سے ہی موجود ہیں۔

ریکھا شرما نے لکھا ہے کہ 'ریپ متأثرہ کی جانب سے شکایت کئے جانے کی تاریخ سے اس معاملے میں ابھی تک کی گئی کاروائی کی تفصیلی رپورٹ فراہم کی جائے ساتھ ہی ریپ متأثرہ کو سیکورٹی نہ فراہم کرنے کی صورت میں اگر کسی افسر کے خلاف کاروائی کی گئی ہے تو اس کی بھی رپورٹ پیش کی جائے'۔

ریکھا شرما نے مزید کہا کہ ریاست میں گذشتہ تین سالوں کے اندر خواتین کے خلاف کتنے مجرمانہ واقعات پیش آئے اور اس میں کتنوں کو ضمانت پر رہا ئی ملی اس کی ایک تفصیلی رپورٹ جلد از جلد کمیشن کو بھیجی جائے۔