کانپور پولیس قتل کیس: وکاس دوبے پر انعامی رقم 5 لاکھ روپے ہوئی

کانپور پولیس قتل کیس کے اہم ملزم وکاس دوبے پر انعامی رقم 5 لاکھ روپے کردی گئی ہے۔ وکاس دبے کی گذشتہ کئی دنوں سے تلاش کی جارہی ہے۔ فائرنگ کے تبادلے کے وقت وکاس پر 50 ہزار روپے کا انعام تھا لیکن اسے آہستہ آہستہ بڑھا کر 5 لاکھ کردیا گیا ہے۔

کانپور پولیس قتل کیس کے اہم ملزم وکاس دوبے کی گرفتاری کے لیے کوشش مسلسل جاری ہے۔ ادھر اترپردیش پولیس نے وکاس دوبے پر اعلان کردہ انعام کو ڈھائی لاکھ سے بڑھا کر 5 لاکھ روپے کردیا ہے۔ واضح رہے کہ جس وقت فائرنگ کا تبادلہ ہوا اس وقت ہسٹری شیٹر وکاس دوبے پر 50 ہزار روپے انعام کا اعلان کیا گیا تھا۔ اس کے بعد اسے بڑھا کر 1 لاکھ کردیا گیا لیکن وکاس کی خبر نہ ملنے پر ناراض، آئی جی نے ڈی جی پی کو خط لکھ کر انعام کی رقم ڈھائی لاکھ روپے کردی۔

واضح رہے کہ کانپور میں 8 پولیس اہلکاروں کے قتل میں پولیس کی 40 ٹیمیں مصروف ہیں۔ پولیس کانپور، اترپردیش۔ مدھیہ پردیش بارڈر، اترپردیش۔نیپال بارڈر تک کے پورے علاقے میں چھاپہ مار چکی ہے لیکن وکاس دوبے کا کوئی سراغ نہیں مل سکا ہے۔

آپ کو بتا دیں کہ گینگسٹر وکاس دبے کے گھر پر چھاپہ مارنے گئی پولیس ٹیم پر وکاس دوبے اور اس کے ساتھی نے شدید فائرنگ کی۔ اس حملے میں ڈپٹی ایس پی سمیت 8 پولیس اہلکار ہلاک ہوگئے، جس کے بعد پوری ریاست میں ہلچل مچ گئی۔

واضح رہے کہ کانپور کے چوبے پور پولیس اسٹیشن میں وکاس دوبے کے خلاف 8 مقدمات درج ہیں۔ ان میں قتل اور قتل کی کوشش جیسے بہت سے سنگین مقدمات ہیں۔ وکاس دوبے کا نام گذشتہ قریب تین دہائیوں سے جرم کی دنیا سے وابستہ ہے۔ انہیں متعدد بار گرفتار بھی کیا گیا تھا لیکن ابھی تک کسی بھی معاملے میں سزا نہیں مل سکی ہے۔