کانپور: پولیس کی بدسلوکی عوام پریشان

کانپور میں پولیس کی بدسلوکی سے عوام پریشان ہیں، کئی تھانہ علاقوں سے شکایتیں سامنے آئی ہیں، پولیس کی بدسلوکی کا ویڈیو بھی وائرل ہوگیا ہے۔ جس پر ایس ایس پی کانپور نے سخت برہمی کا اظہار کیا ہے۔

ریاست اترپردیش کے ضلع کانپور میں پولیس ان دنوں بےلگام ہو چکی ہے۔ کانپور کے دس تھانہ علاقوں میں لاک ڈاؤن ہونے پر پولیس کی بدسلوکی سے عوام پریشان ہیں، لوگوں سے گالی گلوچ مار پیٹ کرنے کی کئی تھانہ علاقوں سے شکایتیں سامنے آئی ہیں، پولیس کی بد سلوکی کا ویڈیو بھی وائرل ہوگیا ہے۔ جس پر ایس ایس پی کانپور نے سخت برہمی کا اظہار کیا ہے۔

کورونا وائرس وباء کے تیزی سے بڑھنے کی وجہ سے کانپور کے دس تھانہ علاقوں میں ان دنوں لاک ڈاؤن لگا ہوا ہے جہاں پر پولیس لاک ڈاؤن قانون کو سختی سے عمل درآمد کرانے میں سرگرداں ہے، عوام کو ضروری چیزوں کی دستیابی کے لئے مقامی سطح پر انہیں چھوٹ بھی دی گئی ہے۔

مگر غیر ضروری کاموں کے لئے نکلنے پر چالان اور جرمانہ بھی عائد کیا جا رہا ہے۔ مگر کچھ جگہوں پر پولیس کی زیادتی بھی بڑھتی جا رہی ہے۔

عوام سے بد سلوکی کی جا رہی ہے، ایسے ہی ایک سب انسپکٹر کا گالی دیتے ہوئے ویڈیو بنا لیا گیا جو اب وائرل ہو رہا ہے، جس پر ایس ایس پی کانپور نے سختی دکھاتے ہوئے الگ الگ تین تھانہ علاقوں کے تین سب انسپکٹر پر جانچ کر سخت کاروائی کرنے کا یقین دلایا ہے۔