کانپور: سابق ایم پی محمد ادیب کی مسلمانوں سے ووٹ نہ کرنے کی اپیل

محمد ادیب نے مسلمانوں سے اپیل کرتے ہوئے کہا کہ وہ یا تو تمام سیکولر جماعتوں کے ساتھ مل کر فرقہ پرست پارٹی کو ہرائیں نہیں تو الیکشن کا ہی بائیکاٹ کریں۔

ریاست اتر پردیش میں 2022 کے شروع میں اسمبلی انتخابات ہونا ہے۔ اس کو دیکھتے ہوئے تمام سیاسی رہنما سرگرم ہو گئے ہیں۔

کانپور پہنچے سابق ایم پی اور علی گڑھ مسلم یونیورسٹی کی مائنارٹی اسٹیٹس کی لڑائی لڑنے والے محمد ادیب نے صحافیوں سے گفتگو کرتے ہوئے کہا کہ موجودہ سیاست فرقہ پرستی کی سیاست ہوگئی ہے۔ مسلمانوں کو چاہیئے کہ وہ ووٹ کا بائیکاٹ کریں تاکہ تمام سیاسی جماعت جو ہندو مسلم کا کارڈ کھیل رہی ہیں وہ روزی روٹی اور روزگار کی طرف توجہ دے سکیں۔

محمد ادیب نے مسلمانوں سے اپیل کرتے ہوئے کہا کہ وہ یا تو تمام سیکولر جماعتوں کے ساتھ مل کر فرقہ پرست پارٹی کو ہرائیں نہیں تو الیکشن کا ہی بائیکاٹ کریں۔

محمد ادیب کا ماننا ہے کہ جب مسلمان الیکشن کا بائیکاٹ کرے گا تو تمام سیاسی پارٹیاں جو ہندو مسلم کارڈ کھیل کر آگے بڑھ رہی ہیں، ان کی توجہ پھر بے روزگاری، روزی، روٹی کی طرف مرکوز ہوجائے گی۔

محمد ادیب نے الیکشن کے بائیکاٹ کی بات ضرور کی لیکن کس سیاسی سیکولر جماعت کو مسلمان ووٹ دیں اس پر اپنی کوئی واضح رائے نہیں دی۔