یادگیر: ہر ہفتہ ویکسین میلہ کے تحت ویکسینیشن کا انعقاد

کرناٹک کے یادگیر میں لوگوں کے درمیان ویکسین لگانے کے لئے ہر چہار شنبہ کو ویکسینیشن کا انعقاد کیا جارہا ہے، جس میں محکمۂ صحت کے عملہ کے علاوہ سرکاری اساتذہ کرام، بلدیہ سے جوڑے لوگ عوام الناس کو بیدار کررہے ہیں۔

ریاست کرناٹک کے ضلع یادگیر کے محکمۂ صحت کی جانب سے ویکسین لگایا گیا۔ اس کے لئے محکمۂ صحت کی طرف سے لوگوں کو بیدار کرنے کے لئے تیاری کی گئی تھی۔ ویکسین انچارج ڈاکٹر ونیتا نے میڈیا سے بات کرتے ہوئے کہا کہ ریاستی حکومت کے احکامات کے مطابق ہر چہار شنبہ کو ویکسین میلہ کا انعقاد کیا جارہا ہے۔

ویکسین میلہ کے لئے 15 سے 16 ٹیمیں بناکر شہر کے مختلف وارڈس میں اٹھارہ سال سے زائد عمر کے مردو خواتین کو مفت ویکسین دی جارہی ہے۔ انہوں نے بتایا کہ کل ایک ہی دن میں 1256 لوگوں کو ویکسین دی گئی ہے۔
اس کام میں سرکاری ٹیچر، آنگن واڑی ٹیچرس، محکمہ بلدیہ کے ذمہ داران بھی محکمۂ صحت کے عملہ کے ساتھ مل کر زیادہ سے زیادہ لوگوں کو ویکسین دینے میں کامیاب ہوئے ہیں۔

ڈاکٹر ونیتا نے کہا کہ آج ہم شہر میں پانچ مقامات پر ویکسین کیمپ لگارہے ہیں اس میں سے ایک کیمپ سرکاری بیڑی دواخانہ ہے جہاں ہفتے کے سات دن ویکسین دینے کی سہولت رکھی گئی ہے۔

اس مرکز میں اتوار کے علاوہ بھی سرکاری تعطیل کے باوجود بھی ویکسین دینے کی سہولت رکھی گئی ہے۔ اس کے علاوہ بسوانت مندر، آثار محلہ، لکشمی مندر اور شانتی نگر ان مقامات پر ویکسین دینے کا انتظام کیا گیا ہے۔