راجوری: مشتبہ حالت میں نوجوان کا قتل

جموں و کشمیر کے ضلع راجوری کے ڈھانگری بلاک کے چکلی گاؤں میں دیر رات انکت ولد بچن کا ان کے گھر پر قتل کردیا گیا، جب کہ قاتل فرار ہونے میں کامیاب ہوگئے۔

انکت کے قتل کے بعد جب گھر والوں نے شور مچایا تو آس پاس کے لوگ جمع ہوگئے اور پولیس کو اطلاع دی گئی جس کے بعد پولیس کی ٹیم موقع واردات پرپہنچی اور لاش کو اپنے قبضہ میں لے کر پوسٹ مارٹم کے لیے بھیج دیا۔

گھر والوں کے مطابق دیر رات کچھ لوگوں نے انکت کے کمرے میں داخل ہوکر اس کا قتل کردیا، نامعلوم افراد نے انکت پر چاقو اور بندوق سے حملہ کیا۔ بعدازں لواحقین نے جموں پونچھ شاہرہ پر گاڑیوں کی آمد و رفت کو بند کر کے احتجاج کیا ہے۔

لواحقین کا کہنا ہے کہ کسی سازش کے تحت اس کا قتل کیا گیا ہے، جس کی تفتیش ہونی چاہئے اور مجرمین کے خلاف جلد از جلد کارروائی کی جائے۔

وہیں پولیس کے مطابق لاش کو ضلع ہسپتال راجوری میں پوسٹ مارٹم کے لیے بھیج دیا گیا ہے، جس کے بعد لاش کو لواحقین کے حوالے کیا جائے گا، اس سلسلے میں پولیس نے کیس درج کرکے کارروائی شروع کردی ہے۔