روہنگیا مسلمانوں پر ایک اور مصیبت

ریاست جموں و کشمیر کے جموں خطے کے مراٹھا محلے کے ترکوٹہ نگر ریلوے اسٹیشن کے قریب جھگیوں میں رہنے والوں پر اس وقت قیامت ٹوٹ پڑی جب چشم و زدن میں ان کے سینکڑوں آشیانے ان کی آنکھوں کے سامنے جل گئے۔

اس زبردست آتشزدگی میں اطلاعات کے مطابق تقریباً 200 سے زائد جھگیاں خاکستر ہوگئیں۔
گزشتہ رات تقریباً ڈیڑھ بجے ایک جھگی میں آگ لگ گئی جس نے آناً فاناً میں کم از کم 200 جھگیوں کو اپنی زد میں لے لیا اور یہاں کے مکین چیخ و پکار کرتے رہ گئے۔

آگ کی اطلاع ملتے ہی فائر اینڈ ایمرجنسی محکمہ نے فائر ٹینڈرز موقع پر بھیجے اور کئی گھنٹوں کی کوششوں کے بعد آگ پر قابو پالیا گیا۔ تاہم متاثرین نے محکمہ پر لاپرواہی برتنے کا الزام لگایا ہے۔

ان جھگیوں میں رہنے والے 300 سے زائد روہنگیائی مسلمان اس حادثے سے نہ صرف صدمے میں ہیں بلکہ اب ان کے سروں پر نہ تو چھت ہے اور نہ ہی کہیں سر چھپانے کی جگہ ہے۔

ابتدائی رپورٹ کے مطابق آگ گیس سلنڈر پھٹنے سے لگی ہے کیونکہ وہاں ایک زوردار دھماکے کی آواز سنی گئی تھی۔ تاہم ان کا کہنا تھا 'ہم نے آگ لگنے کی اصل وجہ جاننے کے لئے تحقیقات شروع کردی ہیں'۔

آگ کی وجہ سے جھگیوں میں رہنے والوں کا بڑے پیمانے پر مالی نقصان ہوا ہے، تاہم کسی جانی نقصان کی کوئی اطلاع نہیں ہے۔

آگ پر قابو پانے کے لئے سات فائر ٹینڈرز کام پر لگا دیے گئے تھے اور قریب دو گھنٹے بعد آگ پر قابو پالیا گیا۔