کورونا کی ٹیکہ کاری کا پانچواں مرحلہ ملک بھر کے ساتھ ساتھ جموں و کشمیر میں بھی 1 مئی سے شروع ہوگیا تھا ۔ جس میں 18 سال سے 44 عمر کے ہر شخص کو ٹیکہ لگایا گیا تھا۔ تاہم بعد میں ٹیکہ کی کمی سے جموں میں اس عمل کو بند کرنا پڑا تھا اور اب پھر سے ایک بار ٹیکہ کاری کا عمل شروع کیا گیا ہے۔
جس کے تحت جموں میں آج متعدد نوجوانوں نے کورونا وائرس مخالف ٹیکہ کاری مہم میں حصہ لیا۔ جموں کے ٹی آر سی دفتر میں پہلے سے رجسٹریشن کرانے والے نوجوانوں کے ساتھ ساتھ ان سپورٹ رجسٹریشن کرنے والے افراد نے ٹیکہ کاری کے اس مرحلے میں بڑھ چڑھ کر حصہ لیا ۔تاہم ٹیکہ کاری کے دوران کورڈ پروٹوکول کا خیال نہیں رکھا گیا۔ جسکے لئے وہاں پر موجود لوگوں نے محکمہ صحت کو ذمہ دار ٹھہرایا۔ جبکہ محکمہ صحت کے ملازمین نے عوام کو سماجی دوری نہ رکھنے کا ذمہ دار ٹھہرایا۔
واضح رہے کہ گذشتہ روز لیفٹیننٹ گورنر منوج سنہا نے جموں وکشمیر میں کوروناوائرس کی موجود صورتحال کا جائزہ لیتے ہوئے کورونا ٹیسٹنگ، ٹریسنگ اور ٹیکہ کاری مہم کو رفتار دینے کے لئے متعلقہ افسران کو ہدایت بھی جاری کی تھی۔