ڈاکٹرز کی مبینہ لاپرواہی سے نوجوان ہلاک

جموں میڈیکل کالج اسپتال میں 27سالہ اجے کمار کی موت پر لواحقین نے ڈاکٹروں کو قصوروار ٹھہرایا ہے۔

نمائندے کے مطابق جموں میڈیکل کالج اسپتال کے احاطے میں دھرنے پر بیٹھے جموں کے مڈ ریواڈی علاقے کے باشندوں نے ڈاکٹروں پر لاپرواہی کا الزام عائد کرتے ہوئے کہا کہ ’’یہ موت نہیں قتل ہے۔‘‘

لواحقین کے مطابق اجے کمار کام کے دوران سیڑھی پر سے گر گیا جس کے بعد اسے معمولی زخمی حالت میں جمعرات کو اسپتال میں داخل کیا گیا۔

فوت شدہ کے اہل خانہ کا کہنا کہ ڈاکٹروں نے اجے کمار کو ڈبل ڈوز انجیکشن دیکر اسے ابدی نیند سلا دیا۔

اس ضمن میں لواحقین نے گورنر انتظامیہ سے انصاف کی اپیل کرتے ہوئے کہا کہ ’’قصوروار ڈاکٹروں کو سزا ملنی چاہئے تاکہ مستقبل میں ایسا واقعہ پیش نہ آئے۔‘‘