نمائندے کے مطابق جموں کے رانی پارک علاقے میں ڈوگرہ فرنٹ کے کارکنوں نے پاکستان اور علیحدگی پسندوں کے خلاف احتجاجی ریلی کے دوران زبردست نعرے بازی کی۔
احتجاج میں شامل کارکنان نے عالمی کرکٹ کپ کے سیمی فائنل میں نیوزی لینڈ سے بھارت کی شکست پر کشمیر میں جشن منانے پر سخت افسوس کا اظہار کیا۔
ذرائع ابلاغ کے نمائندوں سے بات کرتے ہوئے جموں ڈوگرہ فرنٹ کے صدر اشوک گپتا کا کہنا تھا کہ ’’جب ہندوستان کرکٹ میچ ہار گیا تب پورا ملک صدمے میں تھا لیکن کشمیر میں ڈھول اور آتش بازی کی گئی۔‘‘
اشوک گپتا کے مطابق اس جشن سے یہ صاف ظاہر ہوتا ہے کہ ’’کشمیر میں پاکستانی سونچ رکھنے والے افراد موجود ہیں اور ان کے خلاف کارروائی ہونی چاہئے۔‘‘
واضح رہےکہ 10 جولائی کو عالمی کرکٹ کپ کے سیمی فائنل میں نیوزی لینڈ نے بھارت کو 18 رنوں سے شکست دی تھی جس کے بعد کشمیر کے کچھ حصوں میں جشن منایا گیا جس پر آج جموں میں ڈوگرہ فرنٹ کے کارکنوں نے احتجاج کیا۔
