ڈوڈہ: بھرتی سے قبل نوجوانوں کو فوج تربیت دے رہی ہے

جموں و کشمیر کے پہاڑی ضلع ڈوڈہ کے دور دراز گاؤں کے نوجوانوں کو فوج میں بھرتی کرنے سے قبل فوج نے تربیت دینے کا سلسلہ شروع کیا ہے۔ فوج ضلع ڈوڈہ کے مرمت گاؤں سے تعلق رکھنے والے نوجوانوں کا خواب شرمندہ تعبیر کر رہی ہے۔

فوج نے نوجوانوں کو بھرتی کے لیے تیار کرنے کا بیڑا اُٹھایا ہے۔ فوج نے سوہانڈہ کیمپ میں پہلے مرحلے میں اُن نوجوانون کو بھرتی کے لئے تیار کیا ہے، جو فوج میں بھرتی ہونا چاہتے ہیں۔

دوسرے مرحلے کے تحت آج سے 100 سے زائد نوجوانوں کے لئے 45 دِنوں کی تربیت کا عمل شروع کیا ہے۔

فوج کے ایک عہدیدرار کا کہنا ہے کہ بھرتی سے قبل مکمل طور پر نوجوانوں کو جسمانی، ذہنی طور پر تندرست رکھنے کے لئے یہ قدم اُٹھایا گیا ہے۔

فوج نے اپنے کیمپ میں لڑکوں کو پناہ دی ہے۔ فوج کی تربیتی کیمپ میں شامل 100 سے زائد نوجوانوں میں ایک ویکی سنڈیال نے بتایا کہ فوج کی جانب سے نوجوانوں کے لئے یہ ایک مثبت قدم اُٹھایا گیا ہے جو اُنہیں بھرتی سے قبل تربیت فراہم کر رہے ہیں۔ وہ اس موقع کا فائدہ حاصل کرکے مستقبل کو روشن کریں گے۔

مقامی لوگوں نے فوج کے اس اقدام کی ستائش کرتے ہوئے کہا کہ یہ قدم اُن کے بچّوں کی زندگی سنوارنے کے لئے اہم قدم ثابت ہو گا۔

نوجوانوں نے بتایا کہ فوج کی وجہ سے ہی اُن کا وجود ہے۔ وہ تب تک محفوظ ہیں جب تک اُن کی حفاظت فوج کر رہی ہے اس لئے اُن کے اندر بھی ملک کی خدمت کرنے کا جذبہ پیدا ہوا ہے۔

فوج کے کیمپ میں آکر یہ احساس ہو رہا ہے کہ فوج کے جوان اپنے گھروں سے دور رہ کر کس طرح ہماری حفاظت کرتے ہیں، یہ جذبہ دیکھ کر وہ بھی فوج میں بھرتی ہونے کے خواہشمند ہیں۔