جموں: آگ کی واردات میں تین دکانیں خاکستر

جموں کے جانی پور علاقے میں پیر کو سبزی بازار میں آگ کی واردات میں تین دکانیں خاکستر ہوئیں تاہم اس واردات میں کسی جانی نقصان کی کوئی اطلاع نہیں ہے۔

پولیس ذرائع کے مطابق سبزی دکان میں موجود ایک گیس سلینڈر کے پھٹنے سے آگ نمودار ہوئی جس نے آنا فانا دو اور دکانوں کو اپنی لپیٹ میں لے لیا۔

گرچہ فائر اینڈ ایمرجنسی نے بروقت کارروائی کرکے آگ کو قابو میں کرلیا تاہم آگ کی اس ہولناک واردات میں سبزی کی دکانوں کو شدید نقصان پہنچا ہے۔ تاہم اس واردات میں کسی جانی نقصان کی کوئی اطلاع نہیں ہے۔

دریں اثناء اس واقعے کے بعد جموں ویسٹ اسمبلی مومنٹ کے صدر سنیل ڈمپل نے محکمہ پی ڈی ڈی کے خلاف احتجاج کرتے ہوئے کہا کہ ’’اس سے قبل بھی آگ زنی کے واقعات کی وجہ سے جانی پور علاقے میں شدید نقصان پہنچا ہے۔‘‘

انہوں نے انتظامیہ سے متاثرین کی بازآبادکاری کی اپیل کی ہے۔