ڈی ڈی سی انتخابات: ووٹرز کا کیا کہنا ہے؟

مرکز کے زیر انتظام جموں و کشمیر کے اکھنور میں پہلا ووٹ ڈالنے والے چگر سنگھ پوار نے بتایا کہ انہوں نے خوشحالی اور ترقی کے لیے ووٹ کیا ہے۔

چگر سنگھ نے خوشحالی ، ترقی اور ملک کو بلندی پر لے جانے کے لیے ووٹ کرنے کی لوگوں سے اپیل کی ہے۔

سخت سکیورٹی انتظامات کیے گئے ہیں، جہاں کووڈ 19 کی گائیڈ لائن پر عمل کرتے ہوئے ووٹنگ کا عمل جاری ہے۔

جموں میں پر امن طریقے سے ووٹنگ جاری ہے۔ رائے دہندگان کے مطابق وہ جموں و کشمیر میں ترقیاتی کام چاہتے ہیں۔

جموں و کشمیر میں پہلی بار منعقد ہونے والے ڈسٹرکٹ ڈیولپمنٹ کونسل کے انتخابات نیز پنچایتی اور بلدیاتی اداروں کے ضمنی انتخابات کے پہلے مرحلے کی ووٹنگ جاری ہے۔

انتخابات کے پہلے مرحلے 296 امیدوار جموں و کشمیر میں پہلی بار منعقد ہونے والے ڈی ڈی سی انتخابات میں حصہ لے رہے ہیں۔ ان امیدواروں میں سے 172 کا تعلق کشمیر جبکہ 124 کا تعلق جموں سے ہے۔

ووٹ ڈالنے کا عمل صبح سات بجے شروع ہوگیا ہے۔ جو دو بجے تک جاری رہے گا۔

سرکاری ذرائع نے تفصیلات فراہم کرتے ہوئے کہا کہ ضلع جموں میں ڈی ڈی سی انتخابات میں 6 لاکھ 5 ہزار 7 سو 15 رائے دہندگان اپنی حق رائے دہی کا استعمال کریں گے ان میں سے مرد رائے دہندگان کی تعداد 3 لاکھ 15 ہزار 1 سو 7 ہے جبکہ خواتین ووٹروں کی تعداد 2 لاکھ 90 ہزار 6 سو 8 ہے۔

ضلع جموں کے 14 انتخابی حلقوں کے لیے 1 ہزار 2 سو 63 پولنگ بوتھ قائم کئے گئے ہیں۔انہوں نے کہا کہ سٹیٹ الیکشن کمشنر نے انتخابات کے پیش نظر یونین ٹریٹری میں کووڈ پروٹوکال کے بھی موثر انتظامات کئے ہیں۔

ذرائع نے بتایا کہ مہاجر کشمیری پنڈتوں کے لئے جموں اور اودھم پور میں خصوصی پولنگ بوتھ قائم کئے گئے ہیں تاکہ انہیں ووٹ ڈالنے میں کسی دقت کا سامنا نہ کرنا پڑے۔