پارلیمان کے ایوان بالا سے حال ہی میں سبکدوش ہونے والے 71 سالہ سینیئر کانگریسی رہنما غلام نبی آزاد جمعہ کو جموں پہنچے، جہاں ان کا شاندار استقبال کیا گیا۔
سینکڑوں کی تعداد میں کانگریس کارکنان ڈھول، پھول اور ترنگے لے کر غلام نبی آزاد کا استقبال کرنے کے لئے جموں ایئرپورٹ پہنچے۔
کانگریس رہنما کے ایئرپورٹ سے باہر آتے ہی وہاں موجود کارکنان نے ان کا شاندار خیر مقدم کیا۔ تاہم آزاد اپنی گاڑی میں ہی بیٹھے رہے اور ان کی گاڑیوں کا قافلہ ایئر پورٹ سے سیدھے ان کے جموں رہائش گاہ پہنچا، جہاں انہوں نے کارکنان سے ملنا شروع کر دیا۔
اس موقع پر کانگریس کے سینیئر لیڈر اور غلام احمد میر نے بتایا کہ غلام نبی آزاد ہفتہ کے روز گاندھی گلوبل فیملی کے ایک پروگرام میں شرکت کریں گے۔
انہوں نے کہا کہ 'آزاد کا استقبال کرنے کے لئے بڑی تعداد میں لوگ بالخصوص نوجوان ایئرپورٹ آئے ہیں۔'