نابینا طلبا کا جموں میونسپل کارپوریشن کے دفتر پر احتجاجی مظاہرہ

جموں و کشمیر کے سرمائی دارالحکومت جموں میں آج جموں میونسپل کارپوریشن کے کمشنر دفتر کے روبرو روپ نگر بلائنڈ سکول سے آئے ہوئے نابینا طالب علموں نے اپنی مانگوں کو لیکر زبردست احتجاج کیا۔

روپ نگر علاقہ میں نابینا بچوں کےلیے قائم سرکاری سکول کے روبرو جموں میونسپل کارپوریشن اور جے ڈی اے جموں کی زیرنگرانی میں محکمہ پشوپالن کا دفتر تعمیر کیا جارہا ہے جس پر بلائنڈ اسکول میں زیرتعلیم نابینا طلبا نے اعتراض جتایا ہے۔

نابینا بچوں نے جموں میونسپل کارپوریشن کے کمشنر پر وعدہ خلاف کا الزام عائد کرتے ہوئے کہا کہ انہوں نے نابینا طلبا سے بلائنڈ سکول کے سامنے کھیلنے کا میدان تعمیر کرنے کا تیقن دیا تھا۔ طلبا نے بتایا کہ سکول کے روبرو جسمانی طور پر معذور بچوں کےلیے میدان کے بجائے سرکاری دفتر تعمیر کیا جارہا ہے جو ہمارے ساتھ ناانصافی ہے۔

انہوں نے جموں میونسپل کارپوریشن کمشنر سے وہاں کھیل کا میدان بنانے کا مطالبہ کیا تاکہ نابینا بچے وہاں کھیل کود کے مقابلوں میں حصہ لے سکیں۔ احتجاجی طالب علموں کے علاوہ اساتذہ نے بھی انتظامیہ سے بلائنڈ اسکول کے روبرو گائے شالہ کے بجائے بچوں کےلیے گراونڈ تعمیر کرنے کا مطالبہ کیا ہے۔