اننت ناگ میں سرپنچ اور ان کی اہلیہ کی ہلاکت کے خلاف بھارتیہ جنتا یووا مورچہ نے احتجاجی مظاہرہ کیا جس میں عمران خان کے علامتی پتلے اور پاکستان کے پرچم کو نذرآتش کیا گیا۔ احتجاجیوں نے کچی چھاونی چوک پر پاکستان کے خلاف جم کر نعرے بازی کی۔
اننت ناگ میں سرپنچ کی ہلاکت کے خلاف یووا مورچہ کا احتجاجی مظاہرہ اس دوران یوتھ صدر ارن دیو سنگھ جموال نے احتجاج کے دوران ذرائع ابلاغ کے نمائندوں سے بات کرتے ہوئے کہا کہ ’اننت ناگ واقعہ کےلیے پاکستان ذمہ دار ہے جبکہ اس کے خلاف احتجاج کیا جارہا ہے‘۔ ارون دیو سنگھ جموال نے کہا کہ بی جے پی کے رہنماوں نے ملک کی خاطر کئی قربانیاں دی ہیں جبکہ انہیں یاد رکھا جائے گا۔
گذشتہ سال کشتواڑ ضلع میں ہلاک ہونے والے دو رہنماؤں کا ذکر کرتے ہوئے دیو سنگھ نے کہا کہ ان کے قاتلوں کو جس طرح بے نقاب کیا گیا تھا اسی طرح کل کے واقعہ کے ذمہ داروں کو بھی بہت جلد سلاخوں کے پیچھے ڈالا جائے گا۔
یہ بھی پڑھیں: اننت ناگ کے بس اڈے میں کریک ڈاؤن
واضح رہے کہ گذشتہ روز اننت ناگ کے ریڈونی کولگام میں رہنے والے غلام رسول ڈار اور ان کی اہلیہ جواہرہ بانو پر نامعلوم بندوق برداروں نے فائرنگ کرکے ہلاک کردیا تھا۔ یہ دونوں میاں بیوی اننت ناگ میں ایک کرایہ کے کمرے میں رہا کرتے تھے مرکز میں برسراقتدار بھارتیہ جنتا پارٹی سے وابستہ تھے۔ اس واقعہ پر بی جے پی کے علاقہ نیشنل کانفرنس، کانگریس، پی ڈی پی اور اپنی پارٹی نے افسوس کا اظہار کیا ہے۔
