جموں وکشمیر میں ڈی ڈی سی انتخابات کے پہلے مرحلہ کے تحت کونسل کی 43 نشستوں کےلیے آج 51.76 فیصد پولنگ ہوئی۔ پہلے مرحلہ میں 350 سے زیادہ امیدوار میدان میں ہیں۔ انتخابات کے سلسلہ میں سیکیورٹی فورسز کی جانب سے سخت حفاظتی انتظامات کئے گئے تھے ۔
کشمیر صوبہ میں سب سے زیادہ بڈگام میں 56 فیصد پولنگ ہوئی جبکہ جموں صوبہ کے ریاسی ضلع میں سب سے زیادہ 74 فیصد ووٹنگ درج کی گئی۔
کشمیر صوبے کے کپواڑہ میں 50.74 فیصد، بانڈی پورہ میں 43.57 فیصد، بارہمولہ میں 32.51 فیصد، گاندربل میں 48.62، سرینگر میں33.76، بڈگام میں 56.96، پلوامہ میں 6.70، شوپیاں میں 42.58، کولگام میں 34.35 اور اننت ناگ میں 43.32 پولنگ ہوئی وہیں جموں صوبے کے کشتواڑ میں 55.16، ڈوڈہ میں 64.49، رامبن میں 64.21، ریاسی میں 74.62، ادھمپور میں 57.13، کٹھوعہ میں 62.82، سامبہ میں 61.49، جموں میں 61.49، راجوری میں 70.52 اور پونچھ میں 68.69 فیصد ووٹ ڈالے گئے۔
آج ڈی ڈی سی انتخابات کے پہلے مرحلہ کے تحت کشمیر ریجن میں 25 نشستوں اور جموں ریجن میں 18 نشستوں پر ووٹنگ ہوئی۔ آج کے انتخابات میں دلچسپ بات یہ دیکھی گئی کہ انتہائی حساس مانے جانے والے حلقہ شوپیان میں پولنگ فیصد میں زبردست اضافہ دیکھا گیا یہاں 42.58 فیصد پولنگ ہوئی جبکہ گذشتہ انتخابات میں اس علاقہ میں بہت کم پولنگ ہوتی تھی۔ کشمیر ریجن کے پلوامہ حلقہ میں بہت کم ووٹنگ ریکارڈ کی گئی جبکہ یہاں صرف 6.70 فیصد پولنگ ہوئی۔