جے پور: حج کمیٹی کے چیئرمین کی نشست ڈیڑھ برس سے خالی

راجستھان میں کانگریس پارٹی برسر اقتدار ہے، اس بابت مسلمانوں کو ہمیشہ یہ بھروسہ دلایا جاتا رہاہے کہ کانگریس پارٹی مسلمانوں کے مسائل کو حل کرانے اور انہیں ان کا حق دلانے کے لیے ہر لمحہ تیار ہے۔لیکن حقیقت اس کے بالکل برعکس ہے۔

ریاست راجستھان میں کانگریس پارٹی برسر اقتدار ہے لیکن مسلمانوں کے مسائل کے تئیں دیگر ریاستوں کی طرح یہاں کے بھی مسلمانوں کے مسائل کا کوئی حل نہیں نکل رہا ہے۔

جے پور میں واقع حج کمیٹی کے چیئرمین کی سیٹ تقریبا دیڑھ برس سے خالی ہے، عازمین حج 2021 کے تعلق سے آن لائن ایپلکیشن کا سلسلہ اپنے طور پر بدستور جاری ہے۔ مزید حج کے سفر کے تعلق سے رواں برس نئی نئی پابندیاں بھی عائد کی گئی ہیں۔ جن میں دارالحکومت راجستھان سے سعودی عرب کے لیے کوئی بھی پرواز نہیں جائے گی، حج کے کرائے میں اضافہ، ایک کور میں پانچ ممبروں کی جگہ تین ممبر کو ہی رکھنا، 18 برس سے کم عمر اور 65 برس سے زیادہ عمر کے لوگوں کا حج پر نہیں جانا، سمیت دیگر پابندیاں عائد کردی گئی ہے۔

ایسے میں عازمین حج کو جو پریشانیاں لاحق ہیں ان پابندیوں اور پریشانیوں کو دور کرنے کے تعلق سے راجستھان کے مرکزی حج کمیٹی کی میٹنگ میں کوئی بھی ان معاملات کو رکھنے والا نظر نہیں آرہا ہے۔

راجستھان حج ویلفیئر سوسائٹی کے جنرل سیکرٹری حاجی نظام الدین نے بتایا کہ تقریبا ڈیڑھ برس سے حج کمیٹی کا کوئی چیئرمین ہی نہیں ہے، حکومت کو چاہیے تھا کہ فوری طور پر چیئرمین مقرر کرے، انہوں نے کہا کہ یہ ہماری بدقسمتی ہے کہ ایک بہت بڑے عہدے پر ابھی تک کسی کو مقرر نہیں کیا گیا ہے۔

انہوں نے کہاکہ کانگریس پارٹی مسلمانوں کو نظر انداز کر رہی ہے، ہم وزیراعلی اشوک گہلوت سے یہ مطالبہ کرتے ہیں کہ جلد از جلد چیئرمین کو مقرر کیا جائے۔

انہوں نے کہا کہ اگر چیئرمین ہوگا تو عازمین حج کو جن پریشانیوں کا سامنا کرنا پڑ رہا ہے وہ ان کی پریشانیوں کو مرکزی کمیٹی کے اجلاس میں رکھے گا۔