'راجستھان میں تیسرے سیاسی محاذ کی ضرورت'

کل ہند مجلس اتحادالمسلین کے سربراہ اسد الدین اویسی تین دن قبل اچانک جے پور پہنچے اورسرکردہ افراد کے ساتھ میٹنگ کی جس کے بعد راجستھان کے سیاسی حلقوں میں چہ می گوئیاں جاری ہیں۔

ایم آئی ایم کے صدر اور حیدر آباد کے رکن پارلیمنٹ اسدالدین اویسی تین دن قبل اچانک راجستھان کے دارلحکومت جے پور پہنچے اور ایک ہوٹل میں چنندہ افراد کے ساتھ میٹنگ کی۔ اس کے علاوہ انہوں نے ایک انٹرویو بھی دیا جس کے بعد راجستھان کے سیاسی حلقوں میں قیاس آرائیوں کا بازار گرم ہے۔

وہیں دوسری جانب مسلم تنظیموں کے ذمہ داران کا کہنا ہے کہ اگر اسدالدین اویسی راجستھان آتے ہیں تو ہم ان کا استقبال کریں گے۔

مسلم تنظیموں سے جڑے افراد کا کہنا ہے کہ اسدالدین اویسی کو جلد ہی راجستھان کا دورہ کرنا چاہیے۔ ہم ہر قدم پر ان کا ساتھ دیں گے۔

راجستھان حج ویلفیئر سوسائٹی کے جنرل سکریٹری حاجی نظام الدین کا کہنا ہے کہ راجستھان میں کانگریس حکومت ہونے کے باوجود مسلمانوں سے جڑے معاملات پر توجہ نہیں ہے۔

انہوں نے کہا کہ اقلیتی افراد اپنا ووٹ کانگریس کو دیتے ہیں لیکن اقلیتوں کی ترقی نہیں ہو رہی ہے۔ اس لیے راجستھان میں تیسرے محاذ کی سخت ضرورت ہے۔

وہیں پاپولر فرنٹ آف انڈیا کے ذمہ داران کا کہنا ہے کہ اگر اسد الدین اویسی راجستھان کے دورہ پر آتے ہیں تو ہم ان کا استقبال کریں گے۔ کیونکہ راجستھان میں تیسرے محاذ کی سخت ضرورت ہے۔

وہیں جماعت اسلامی ہند کے راجستھان کے صدرکا کہنا ہے کہ راجستھان میں تیسرے محاذ کی ضرورت تو ہے لیکن وہ محاذ ذات اور برادری سے بالاتر ہو۔