جے پور: خبر کا اثر، سیاحتی مقامات پر نظر آئی پولیس

عالمی وبا کورونا وائرس کی دوسری لہر میں نمایاں کمی واقع ہونے اور لاک ڈائون میں نرمی دیے جانے کے بعد جہاں تجارتی و دیگر سرگرمیاں بحال ہو رہی وہیں بازاروں اور دفاتر خصوصاً سیاحتی مقامات پر وائرس کی روک تھام کے لیے وضع کی گئی گائیڈ لائنز کی کھلے عام خلاف ورزی بھی کی جا رہی ہے۔

ریاست راجستھان کے دارالحکومت جے پور میں سیاحتی مقامات پر کورونا وبا کی روک تھام کے لیے وضع کی گئی گائیڈ لائنز کی خلاف ورزی سے متعلق ای ٹی وی بھارت کے ذریعے خبر نشر کی گئی تھی۔ ای ٹی وی بھارت کی خبر کا سنجیدہ نوٹس لیتے ہوئے پولیس نے سیاحتی مقامات پر پولیس اہلکاروں کو تعینات کر دیا ہے۔

جے پور میں سیاحتی مقامات پر پولیس اہلکار گشت کرتے ہوئے نظر آ رہے ہیں اور کورونا گائیڈ لائنز کی خلاف ورزی کرنے والے افراد کی کونسلنگ کر رہے ہیں۔ وہیں پولیس کی بات نہ ماننے والے افراد اور کووڈ گائیڈ لائنز کو بالائے طاق رکھنے والے افراد کے خلاف قانونی کارروائی بھی کی جا رہی ہے۔

جل محل علاقے میں ٹیم کے ساتھ پہنچے برہمپوری پولیس تھانے کے انچارج نے ای ٹی وی بھارت کے ساتھ خاص گفتگو کے دوران بتایا کے سیر و تفریح کے لیے آنے والے لوگوں کو رہنما خطوط کی پاسداری کرنے کی تلقین کی جا رہی ہے، وہیں گائیڈ لائنز کی خلاف ورزی کرنے والے افراد کو گھر واپس روانہ کیا جا رہا ہے۔

انہوں نے کہا کہ عوامی مقامات پر جو لوگ بنا ماسک تفریح کے لیے پہنچ رہے ہیں ان کے خلاف کارروائی کی جا رہی ہے۔

انہوں نے کہا کہ پولیس کی جانب سے لاؤڈ اسپیکر کے ذریعے لوگوں کو کورونا وائرس گائیڈ لائز کی پاسداری کرنے کی اپیل کی جا رہی ہے، وہیں دکانداروں کو بھی بھیڑ بھاڑ جمع نہ کرنے تلقین کی جا رہی ہے۔