ریاست راجستھان کے دارالحکومت جے پور میں واقع شہید اسمارک پر چند سماجی تنظیموں کی جانب سے افغانستان میں جاری بحران کے سبب وہاں کی پریشان حال خواتین کی حمایت میں مظاہرہ کیا اور نعرے بازی کی۔
جے پور میں افغان خواتین کے حمایت میں نعرے بازی نعرے بازی کے دوران تمام لوگوں نے اپنے ہاتھوں میں طالبان کے خلاف نعرے لکھے ہوئے پلے کارڈ بھی لیے ہوئے تھے، جس میں انھوں نے مطالبہ کیا کہ حکومت ہند افغان میں پریشان خواتین کو واپس لانے کے عمل میں تیزی لائے۔
احتجاج کر رہے لوگوں کا کہنا تھا کہ افغانی عوام پریشان ہیں۔ وہاں پر کوئی بھی محفوظ نہیں ہے۔ ایسے میں مرکزی حکومت کو چاہیے کہ افغانستان میں جو بھارتی ابھی بھی پھنسے ہوئے ہیں ان لوگوں کو جلد از جلد واپس لایا جائے۔
احتجاجی مقام پر کسی طرح سے امن کا ماحول خراب نہ ہو اس لیے یہاں پر کثیر تعداد میں پولیس کی ٹیم بھی تعینات کی گئی تھی۔
واضح رہے کہ طالبان اور امریکہ کے درمیان معاہدے کی صورت میں امریکہ افغانستان سے اپنے تمام فوجیوں 31 اگست تک واپس بلانے کی آخری تاریخ طے کی ہے جس سے قبل ہی طالبان نے تقریبا پورے ملک پر اپنا کنٹرول سنبھال لیا۔
طالبان کی جانب سے افغانستان کے دارالحکومت کابل پر مکمل کنٹرول کے بعد وہاں کے باشندوں میں طالبان کے سابق طرز عمل کے پیش نظر شدید خوف کا ماحول پیدا ہوگیا ہے جس کی وجہ سے وہاں سے نکلنے کے لیے ہزاروں افغانی کابل ایئرپورٹ کا رخ کر رہے ہیں اور کافی زیادہ ہجوم جمع ہونے اور بھگدڑ کی وجہ کئی جانیں بھی جاچکی ہیں۔
یہ بھی پڑھیں: Afghans refugee: دہلی میں افغان مہاجرین کا مظاہرہ
وہیں، دوسری جانب طالبان نے ملک میں عام معافی کا اعلان کرنے کے ساتھ ساتھ تمام لوگوں کو چاہے وہ کسی بھی مذہب سے تعلق رکھتا ہو مکمل سیکیورٹی فراہم کرنے کا بھی یقین دلا چکے ہیں، اس کے باوجود لوگوں کا انخلا ابھی بھی جاری ہے۔
