حکومت پیچھے ہٹے یا نہیں ہم دو قدم آگے رہیں گے

جامعہ ملیہ اسلامیہ اور علی گڑھ مسلم یونیورسٹی کے طالبات کی ای ٹی وی بھارت سے خاص بات چیت۔

ریاست راجستھان کے دارالحکومت جے پور میں شہریت ترمیمی قانون، این آر سی اور این پی آر کے مخالفت میں ایک خواتین اجلاس کا اہتمام کیا گیا۔

اجلاس کے مہمان خصوصی جامعہ ملیہ یونیورسٹی اور علی گڑھ مسلم یونیورسٹی کے طلباء رہے۔ ان طلباء نے ای ٹی وی بھارت کے نمائندے سے خاص بات چیت بھی کی۔ طلبہ کا کہنا ہے کہ جس طریقہ سے آج ملک کے حالات ہو رہے ہیں وہ بہت خراب ہیں۔ جب طلبہ شہریت ترمیمی قانون کی مخالفت کر رہے ہیں تو ان کو روکا جا رہا ہے۔ پولیس کی جانب سے مار پیٹ کی جا رہی ہے جو کہاں تک صحیح ہے۔

جامعہ ملیہ اسلامیہ کی طالبہ عائشہ نے کہا کہ اس روز ہم امن وامان کے ساتھ ساتھ احتجاجی مظاہرہ کر رہے تھے لیکن یہ بات پولیس کو ناگوار لگی اور انھوں نے ہمارے اوپر لاٹھی چارج کر دیا۔ اس درمیان ہمارے کئی دوستوں کو زیادہ زخم بھی آگئے، جو ہم لوگوں نے ان کو بچانے کی کوشش کی تو ہمیں بھی مارا پیٹا گیا۔

انہوں نے کہا کہ چاروں طرف سے پولیس ہی پولیس نظر آ رہی تھی اور تمام طلبہ دوڑتے ہوئے دکھائی دے رہے تھے۔

عائشہ نے بتایا کہ اگر وقت رہتے حالات قابو میں نہیں آتے تو آج ہم یہ دن بھی نہیں دیکھ پاتے۔

طالبات کا کہنا ہے کہ ہمارا آئین ہمیں مخالفت کرنے کی اجازت دیتا ہے پھر ہمارے اوپر ہی اس طریقہ سے پولیس کارروائی کرتی ہے، یہ کہاں کا انصاف ہے۔ اگر ہمیں انصاف نہیں ملتا تو یہ مہم وہ پورے ہندوستان میں چلائی جائے گی۔

واضح رہے کہ ریاست راجستھان میں شہریت ترمیمی قانون کی مخالفت کی جا رہی ہے اور اسی کے تحت آج ایک اجلاس کا اہتمام بھی دارالحکومت جے پور کے البرٹ ہال پر کیا گیا تھا۔