جے پور میں 10 اکتوبر کو اجتماعی شادیوں کی تقریب کا انعقاد

راجستھان کے دارالحکومت جے پور کے موتی ڈونگری روڈ علاقے میں واقع مسلم مسافر خانے میں 10 اکٹوبر کو اجتماعی شادی پروگرام منعقد کیا جائے گا۔ اس بات کا اعلان احساس سوشل ویلفیئر ٹرسٹ کی جانب سے کیا گیا۔

جے پور میں احساس سوشل ویلفیئر ٹرسٹ کے عہدیداروں نے میڈیا سے بات کرتے ہوئے کہا کہ اجتماعی شادی کے لیے مسلمانوں کے تمام مسالک کے ماننے والے خواہشمند حصہ لے سکتے ہیں۔ انہوں نے کہا کہ ابھی تک 10 تا 15 جوڑوں نے نکاح کے لیے رجسٹر کیا ہے۔

انہوں نے بتایا کہ اجتماعی طور پر شادیاں کرانے کا مقصد امیر اور غریب کے درمیان کے فاصلہ کو ختم کرنا ہے۔ انہوں نے کہا کہ مسلم سماج میں ایسی کافی لڑکیاں ہیں جن کی عمر زیادہ ہونے کی وجہ سے یا پھر رقم نہ ہونے کی وجہ سے شادی نہیں ہورہی ہے۔

ٹرسٹ کے ذمہ دار نے بتایا کہ ایسے افراد کی تکالیف کو دیکھتے ہوئے تنظیم کو تنظیم کو تشکیل دیا گیا اور 10 اکتوبر کو اجتماعی شادیوں کی تقریب منعقد کی جائے گی جب کہ اس میں کسی بھی شخص سے رقم نہیں لی جائے گی۔ انہوں نے کہا کہ مستقبل میں ٹرسٹ کی جانب سے اجتماعی شادیوں کے علاوہ تعلیمی سرگرمیوں پر بھی توجہ دی جائے گی۔