جے پور: پیرا ٹیچرز کا مہا پڑاؤ ختم، دھرنا جاری رکھنے کا اعلان

راجستھان کے دار الحکومت جے پور میں واقع شہید اسمارک پر یکم نومبر سے مدرسہ پیرا ٹیچرز، راجیو گاندھی پیرا ٹیچرز اور شکشاکرمیوں کی جانب سے مستقل ملازمت کے مطالبہ پر جاری ’مہا پڑاؤ‘ کو ختم کر دیا گیا۔

راجستھان کے جے پور میں احتجاج کر رہے پیرا ٹیچرز کے سربراہ شمشیر بھالو خان نے مہا پڑاؤ کے خاتمے کا اعلان کر دیا ہے۔ وہیں راجستان حکومت کے خلاف 15 اکتوبر سے جاری غیرمعینہ مدت کا دھرنا جاری رکھنے کی بات کہی گئی ہے۔

وہیں اس پورے معاملے کو لے کر شمشیر بھالو خان نے کہا کہ راجستھان حکومت سے مستقل ملازمت کا مطالبہ کرتے ہوئے یکم نومبر سے مہا پڑاؤ کا آغاز کیا گیا تھا جس کا آج اس کا اختتام ہوگیا۔ انہوں نے کہا کہ جو دھرنا پروگرام چل رہا ہے وہ مسلسل جاری رہے گا۔

انہوں نے بتایا کہ مہا پڑاؤ میں شرکت کرنے والے تمام احتجاجی اب اپنے اپنے علاقوں کے ارکان اسمبلی کے گھر کے باہر دھرنا دیں گے اور حکومت کے خلاف احتجاجی مظاہرہ کیا جائے گا جس کا سلسلہ جاری رہے گا۔

انہوں نے کہا کہ جب تک ہمارے مطالبات پر حکومت کی جانب سے توجہ نہیں دی جاتی تب تک ہم لوگ جے پور کے شہید اسمارک سے واپس نہیں جائیں گے۔

واضح رہے کہ مستقل ملازمت کے مطالبہ پر 15 اکتوبر سے جے پور کے شہید اسمارک پر مدرسہ پیرا ٹیچرز، راجیو گاندھی پیرا ٹیچرز اور شکشاکرمیوں کی جانب سے غیر معینہ دھرنا دیا جا رہا ہے تاہم حکومت پر مزید دباؤ ڈالنے کے لیے یکم نومبر سے مہا پڑاؤ کا آغاز کیا گیا تھا۔