راجستھان: ٹرک تصادم میں آتشزدگی سے دو افراد ہلاک

آتشزدگی اتنی خوفناک ہوئی کہ دونوں ٹرک دیکتھے ہی دیکھتے خاکستر ہو گئے اور پولیس وہاں موجود رہ کر بھی ٹرکوں کے قریب نہیں جا سکی۔

راجستھان کے چورو میں دو ٹرک میں تصادم کے بعد آتشزدگی میں 2 افراد زندہ جل گئے ہیں، جبکہ دیگر کئی لوگوں کے بھی ہلاک ہونے کا اندیشہ ظاہر کیا جا رہا ہے۔

قومی شاہراہ 52 پر جمعہ کی شام دو ٹرکوں کی آپس میں زبردست ٹکر ہو گئی، تصادم کے بعد دونوں ٹرکوں میں زبردست آگ بھڑک اٹھی، آگ اتنی خوفناک ہوگئی کہ کوئی بھی اس آگ کو نہیں بجھاسکا۔ اس دوران ٹرک میں سوار دو افراد زندہ خاکستر ہو گئے۔ اسی کے ساتھ ہی حادثے میں مرنے والوں کی تعداد میں اضافے کا بھی اندیشہ ظاہر کیا جا رہا ہے۔ ابھی تک دو افراد کے ہلاک ہونے کی تصدیق ہوگئی ہے۔

آتشزدگی اتنی خوفناک ہوئی کہ دونوں ٹرک دیکتھے ہی دیکھتے خاکستر ہو گئے اور پولیس وہاں موجود رہ کر بھی ٹرکوں کے قریب نہیں جا سکی۔ اس حادثے نے وسائل کی کمی اور انتظامیہ کی ناکامی کو بھی ظاہر کیا ہے۔ قومی شاہراہ پر حادثات میں مسلسل اضافے کے باوجود انتظامیہ نے کوئی انتظام نہیں کیا ہے، تاکہ حادثات کے فوری بعد امدادی اور بچاؤ کے کام شروع کیے جاسکیں۔

حادثے کی اطلاع کے باوجود انتظامی اہلکار گھنٹوں کے بعد موقع پرپہنچے۔ اس کے بعد دودھواکھارہ تھانہ پولیس نے تارا نگر سے فائر بریگیڈ کی گاڑیوں کو بلوایا اور آگ پر قابو پانے کی کوشش کی لیکن آگ اتنی خوفناک تھی کہ وہ بجھ نہیں سکی۔ ایسی صورتحال میں چورو اور راج گڑھ سے بھی فائر کی گاڑیوں کو طلب کیا گیا۔ تین فائر فائٹرز نے قریب ڈھائی گھنٹے کی سخت محنت کے بعد بھی آگ پر قابو نہیں پایا۔

اے ایس پی یوگیندر فوجدار، سی او سٹی ممتا سارسوت، ایس ڈی ایم ابھیشیک کھنہ اور تحصیلدار موقع پرپہنچ گئے۔ جے سی بی اور دیگر ذرائع کی مدد سے ٹرکوں کو سڑک سے ہٹا کر شاہراہ پر جام کو ہٹایا گیا۔

اس حادثے میں 22 پہیے والا ایک ٹرک تھا جو دس پہئے والے ٹرک سے ٹکرا گیا۔

موقع پر موجود لوگوں کے مطابق 22 پہیئے والے ٹرک میں بڑی مقدار میں ریفائن آئیل بھرا ہوا تھا جبکہ دوسرے 10 پہیئے والے ٹرک میں بڑی مقدار میں گھی لوڈ تھی۔