راجیو گاندھی جینتی پر ڈاکٹر کلا کی اپیل

کانگریسی رہنما نے کہا کہ 'ملک میں ایک سب کے لئے اور سب ایک کے لئے کے جذبے کے ساتھ ایک دوسرے کی مدد کرنے اور ہم آہنگی کے ماحول کو برقرار رکھنے کا عزم کرنا، راجیو گاندھی کو ہمارا سچا خراج عقیدت ہوگا۔'

رجستھان کے وزیر برائے توانائی اور واٹر سپلائی ڈاکٹر بی آر ڈی کلا نے سابق وزیر اعظم آنجہانی راجیو گاندھی کے خوابوں کو پورا کرنے کے لئے سبھی سے غریبوں کے فلاح بہبود، ناخواندگی اور عدم مساوات کو دور کرنے کا عہد کرنے کی اپیل کی۔

ڈاکٹر کلا نے یہ بات راجیو گاندھی جینتی-قومی سدبھاونا دوس کے موقع پر یہاں جواہر سرکل پر منعقدہ خصوصی شجرکاری مہم کے موقع پر کہی۔ انہوں نے کہا کہ ملک میں ایک سب کے لئے اور سب ایک کے لئے کے جذبے کے ساتھ ایک دوسرے کی مدد کرنے اور ہم آہنگی کے ماحول کو برقرار رکھنے کا عزم کرنا، راجیو گاندھی کو ہمارا سچا خراج عقیدت ہوگا۔

یہ اہتمام وزیر کی پہل پر جواہر سرکل پر باقاعدگی سے مارننگ واک کے لئے آنے والے لوگوں کی ایک ٹیم کی جانب سے کی گیا تھا ۔

ڈاکٹر کلا نے راجیو گاندھی کو خراج عقیدت پیش کرتے ہوئے کہا کہ راجیو گاندھی نے نہ صرف ملک بلکہ تیسری دنیا کے ممالک کی بھی رہنمائی کی اور ملک کو اکیسویں صدی میں لے جانے کے لئے مواصلاتی انقلاب کی تشہر کی، اسی کا نتیجہ ہے آج دنیا کے کسی بھی کونے میں مواصلات کی جو بہترین سہولیات ہیں ، وہ ہندوستان کے شہریوں کو بھی دستیاب ہیں۔