جے پور: کورونا وبا کے سبب مسلسل ہلاکتوں میں اضافہ

ریاست راجستھان میں عالمی وبا کورونا وائرس سے ہلاک ہونے والوں کی تعداد میں مسلسل اضافہ ہو رہا ہے، روزانہ 50 سے زائد لوگوں کے ہلاک ہونے کی اطلاعات موصول ہورہی ہیں۔

دارالحکومت جے پور کے گھاٹ گیٹ قبرستان میں بدھ کے روز 7 میت تدفین کے لیے لائی گئیں ان ساتوں میت کو حکومت کی گائیڈ لائن کے مطابق ہی سپردخاک کیا گیا۔

تدفین کرانے والے جاوید پٹھان کا کہنا ہے کہ 13 ماہ کے ایک طویل عرصے میں پہلی مرتبہ ایسا ہوا ہے کہ بیک وقت 7 میت تدفین کے لیے قبرستان میں لائی گئی ہیں۔

انہوں نے کہا کہ 'ہم اللہ سے دعا گو ہیں کہ جلد از جلد تمام برادران وطن کو اس وبا سے نجات ملے۔ انہوں نے مزید لوگوں سے اپیل کی کہ 'حکومت کی جانب سے جو ایڈوائزری جاری کی گئی ہے، اس کا مکمل خیال رکھیں۔'

انہوں نے بتایا کہ 'جے پور کے گھاٹ گیٹ قبرستان میں تیرہ ماہ میں 181 اور شاشتری نگر قبرستان میں 73 میتوں کو سپرد خاک کیا گیا ہے'۔