آکسیجن اور دواؤں کے لئے مرکز سے مطالبہ کرنے کی اپیل

راجستھان کے وزیر اعلی اشوک گہلوت نے عالمی وبا کورونا کے دوران ریاست میں آکسیجن اور ادویات کی کمی کا حوالہ دیتے ہوئے بھارتیہ جنتا پارٹی (بی جے پی) کے رہنماؤں سے اپیل کی ہے کہ وہ مرکزی حکومت سے ریاست کو آکسیجن اور دوائیں الاٹ کرنے کی اپیل کریں۔

اشوک گہلوت نے آج یہ اپیل سوشل میڈیا کے ذریعے کی۔ انہوں نے کہا کہ "میں اپوزیشن لیڈروں، بی جے پی کے ریاستی صدر اور ریاست کے تمام اراکین پارلیمنٹ سے اپیل کرتا ہوں کہ وہ وزیر داخلہ امت شاہ ، وزیر صحت ہرش وردھن ، مرکزی وزیر من سکھ ماندویا اور بی جے پی صدر جے پی نڈا سے بات کر کے ریاست کے لئے آکسیجن اور دواؤں کے الاٹمنٹ بڑھانے کا مطالبہ کریں۔'

انہوں نے کہا کہ مرکزی حکومت نے پورے ملک کے آکسیجن اور ریمیڈیسور دواوں کی تیاریوں کو کنٹرول کررکھا ہے، لہذا ہم کھلی منڈی سے آکسیجن اور دوائیں نہیں خرید سکتے ہیں۔

انہوں نے بتایا کہ اب وقت آگیا ہے کہ سیاست سے بالاتر ہو کر ریاست کے لئے کام کریں۔ ہماری کوشش ہے کہ مرکزی اور ریاستی حکومتیں مل کر کورونا کے خلاف لڑنے کے لئے کام کریں۔ ہماری کوشش ہے کہ راجستھان میں کوئی بھی مریض آکسیجن کی کمی کی وجہ سے زندگی کی جنگ نہ ہار جائے۔ لیکن اس کے لئے ہمیں مناسب مقدار میں آکسیجن الاٹ کرنے کی ضرورت ہے۔

یو این آئی