کمپیوٹر بابا سے سرکاری اراضی کو آزاد کرانے کی مہم جاری

مدھیہ پردیش کے اندور میں کمپیوٹر بابا کے نام سے مشہور نامدیوداس تیاگی کے غیرقانونی آشرم کو زمیں دوز کیے جانے کے ایک روز بعد آج صبح انتظامیہ نے ان کے قبضے سے سرکای زمینوں کو آزاد کرانے کی مہم سلسلہ وار جاری رکھی ہے۔

سرکاری معلومات کے مطابق ٹیم فورس کے ساتھ یہاں سپر کاریڈور واقع منصوبہ نمبر 151، امبکا پور میں کارروائی کا آغاز کیا گیا۔ انتظامیہ نے منصوبہ نمبر 151 کی 20 ہزار مربع فٹ بیش قیمتی زمین کو خالی کرالیا ہے۔وہیں امبکا پور میں بھی کارروائی کی گئی۔

اس سے قبل کل یہاں انتظامیہ نے 40 ایکڑ سے زیادہ رقبے میں پھیلی زمین کو تجاوزات سے آزاد کرایا۔ اس کارروائی کے دوران انتظامیہ کو بابا کے متعدد بینک اکاونٹ اور یہاں سے عیش وآرام کی بہت سی اشیاء ملی ہیں۔ اس معاملے میں بھی علیحدہ تحقیقات کی جارہی ہے۔

کمپیوٹر بابا گزشتہ چندبرسوں سے سیاسی سرگرمیوں کے سبب زیربحث رہے ہیں۔ وہ جہاں سابقہ بی جے پی حکومت سے وابستہ رہے، تو بعد میں کانگریس حکومت سے جڑ گئے۔ سابقہ کمل ناتھ حکومت میں بھی وہ وزیرمملکت تھے۔ وہ ریاست میں 28 اسمبلی نشستوں پر ضمنی انتخابات میں کانگریس کے نمایاں تشہیر کار تھے۔