اندور میں کورونا مریضوں کی کل تعداد 2378 ہوئی

اندور میں کورونا وائرس تھمنے کا نام نہیں لے رہا ہے۔ جمعہ کے روز اندور میں 79 نئے کورونا مثبت مریض پائے گئے۔ جس کے بعد اندور میں متاثرہ افراد کی تعداد 2378 ہوگئی ہے جبکہ 99 مریض فوت ہوگئے ہیں۔

ریاست مدھیہ پردیش کے شہر اندور میں تمام تر کوششوں کے باوجود کورونا سے متاثرہ مریضوں کی تعداد بڑھ رہی ہے۔ جمعہ کی شام کو اندور میں 79 نئے کورونا مثبت معاملے سامنے آئے ہیں۔ اندور میں متاثرہ مریضوں کی تعداد 2378 ہوگئی ہے، وہیں 99 مریض اب تک ہلاک ہوئے ہیں۔

ایم جی ایم میڈیکل کالج کی جانب سے رات گئے جاری کردہ میڈیکل بلیٹن کے مطابق گزشتہ روز 79 نئے کورونا مثبت مریض ملے ہیں، جبکہ 976 مریضوں کی رپورٹ منفی آئی ہے۔ ضلع کے چیف میڈیکل اینڈ ہیلتھ آفیسر ڈاکٹر پروین جڑیہ کے مطابق ضلع میں کورونا انفیکشن کی وجہ سے اب تک 99 افراد ہلاک ہوچکے ہیں۔

ڈاکٹر جڑیہ نے بتایا کہ جمعہ کے روز ہی دو مثبت مریض مکمل طور پر صحتمند ہوچکے ہیں، اس طرح ضلع میں اب تک 1100 کورونا مریض مکمل طور پر صحتمند ہوچکے ہیں۔ اس وقت 1179 کورونا مثبت مریض مختلف ہسپتالوں میں زیر علاج ہیں۔

ڈاکٹر جڑیہ نے بتایا کہ اب تک 2061 افراد کو ضلع کے مختلف قرنطینہ مراکز سے فارغ کیا جا چکا ہے۔