حیدرآباد سیلاب متاثرین میں تلنگانہ وقف بورڈ کی جانب سے تقریباً 20 لاکھ روپئے مالیتی اشیا تقسیم کی جارہی ہے جبکہ آج حج ہاوز کے احاطہ میں وزیر داخلہ محمد محمود علی نے امدادی اشیا سے لدی گاڑیوں کو ہری جھنڈی دکھاکر روانہ کیا۔
اس موقع پر وقف بورڈ کے چیرمین محمد سلیم، مجلس کے ارکان اسمبلی احمد بلعلہ، جعفر حسین معراج، احمد پاشاہ قادری و دیگر موجود تھے۔
وزیر داخلہ محمد محمود علی نے وقف بورڈ کی جانب سے کئے جارہے امدادی کاموں کو سراہا۔ محمد سلیم چیرمین وقف بورڈ نے بتایا کہ سیلاب متاثرین میں 20 لاکھ مالیتی اشیا کے تقریباً ایک ہزار 500 کٹس تقسیم کئے جارہے ہیں۔ انہوں نے کہا کہ اگر ضرورت ہوگی تو مزید امدا کی جائے گی۔ محمد سلیم نے مزید کہا کہ لاک ڈاون کے دوران بھی وقف بورڈ کی جانب سے غریبوں میں ضروری اشیا کی تقسیم عمل میں لائی گئی تھی۔
محمد سلیم نے مزید کہا کہ تلنگانہ وقف بورڈ کی جانب سے فلاحی کام انجام دیئے جارہے ہیں۔ انہوں نے کہا کہ وقف بورڈ کی جانب سے بیواؤں میں وظیفہ تقسیم کئے جاتے ہیں اور مریضوں، غریب افراد کی مالی مدد کی جاتی ہے۔