تلنگانہ: اردو کے صحافیوں کو ایکریڈیٹیشن کارڈ دینے کا حکم

تلنگانہ اردو ورکنگ جرنلسٹس یونین نے اردو صحافیوں کے ساتھ ایکریڈیٹیشن کارڈز دینے میں کی جارہی ناانصافیوں کو ہائی کورٹ میں چیلینج کیا تھا۔

یونین کی جانب سے داخل کردہ عرضی میں واضح کیا گیا تھاکہ اردو اخبارات اور ٹی وی چینلز کو تیلگو اخبارات اور ٹی وی چینلز کے مساوی ایکریڈیٹیشن کارڈز نہیں دیے جارہے ہیں، جس سے ہزاروں اردو صحافی اور ان کے افراد خاندان سرکاری مراعات جیسے ہیلتھ کارڈز،خانگی اسکولوں کی فیس میں رعایت، انشورنس اور ہاوزنگ وغیرہ سے محروم ہونا پڑرہا ہے۔

اس سلسلہ میں یونین کی جانب سے ایڈوکیٹ ولادمیر خاتون نے عدالت کو بتایا کہ جی او 239 کے ذریعہ آرٹیکل 14کی کھلی خلاف ورزی کی گئی، انھوں نے عدالت میں بحث کے دوران کہاکہ، جی او میں ایک تلگو ٹی وی چینل کو ریاست گیر سطح پر 295 کارڈز اور جبکہ ایک اردو چینل کو صرف 78 کارڈز کیلئے اہل قرار دیا گیا۔ اسی طرح اردو اخبارات کے معاملے میں بھی امتیاز برتا گیا۔ جس پر عدالت نے گورنمنٹ پلیڈر سے اس کا جواز طلب کیا مگر وہ جواب دینے سے قاصر رہے۔چیف جسٹس راگھویندر سنگھ چوہان اور جسٹس ابھیشک ریڈی کی بینچ نے یونین کے دلائل کو مدنظر رکھتے ہوئے درمیانی درجہ کے اردو اخبارات اور اردو ٹی وی چینلس کو تلگواخبارات اور ٹی وی چینلس کے مماثل کارڈز جاری کرنے کا عبوری حکم نامہ جاری کیا۔جس پر یونین کےذمہ داران نے خوشی ومسرت کا اظہار کیا اور اردو اداروں سے اس سنہری موقع سے استفادہ کرنے کی خواہش کی۔