اس سے قبل جمعرات کے روز ہائی کورٹ نے اپنے حکم میں ریاستی حکومت کو ہدایت دی تھی کہ وہ پٹاخوں کی فروخت اور استعمال پر پابندی عائد کرے اور جو دکانیں پٹاخے فروخت کررہی ہیں انہيں بند کردیں۔
عدالت نے ریاستی حکومت کو پرنٹ میڈیا، پریس اور الیکٹرانک میڈیا کے ذریعہ ہوا کے معیار کو خراب ہونے سے بچانے کے لئے لوگوں سے پٹاخے نہ پھوڑنے کی اپیل کرنے کی بھی ہدایت دی ہے۔
اس سلسلے میں حکومت کی جانب سے جمعہ کے روز جاری ہونے والے ایک حکمنامہ میں کہا گیا ہے کہ اس معاملے کی حساسیت کے پیش نظر اور ہائی کورٹ کی ہدایتوں پر عمل کرتے ہوئے پٹاخوں کی فروخت اور پٹاخے پھوڑنے پر فوری طور پر پابندی عائد کردی گئی ہے۔
ریاست میں آتش بازی کی روک تھام کے لئے ریاست کے ڈائریکٹر جنرل پولس، فائر سروس کے ڈائریکٹر جنرل، تمام کلکٹر اور ضلع مجسٹریٹ، کمشنر، پولس سپرنٹنڈنٹ دکانوں کو بند کرنے کے لیے فوری کارروائی کریں گے اور اس سلسلے میں کیے گئے اقدامات سے حکومت کو 16 نومبر تک مطلع کریں گے۔