بھارت کی جنوبی ریاست تلنگانہ کے دارالحکومت حیدرآباد میں ملک کی مشہور و معروف دینی درسگاہ جامعہ نظامیہ میں 'علماء نظامیہ آرگنائزیشن' کے علماء نے موجودہ حالات پر ایک پریس کانفرنس کی۔
اس کانفرنس میں مولانا حافظ سعید توفیق اللہ بخاری نے کہا کہ معاشرہ میں جہیز کے نام پر جو ظلم ہو رہا ہے اس کو روکنے کے لیے تمام تر کوششیں کی جارہی ہے۔
بھارت کے مختلف ریاستوں کے مساجد میں جہیز کی لعنت ختم کرنے پر خطابات کیے گئے ہیں اور علماء کرام نے اپیل کی ہے کہ جہیز کی لعنت کو ختم کرنے کے لیے ہر ممکن کوشش کی جائے، علماء کرام نے کہا کہ اس لعنت نے معاشرہ کو تباہی کے دہانے پر کھڑا کردیا ہے۔
اس موقع پر جامعہ نظامیہ کے عظیم سپوت اور عثمانیہ یونیورسٹی کے سابق صدر شعبۂ عربی پروفیسر ڈاکٹر محمد عبدالمجید صاحب نظامی نے کہا کہ علماء کی ذمہ داری ہے کہ وہ غیر شرعی شادیوں کا بائیکاٹ کریں۔
انہوں نے کہا کہ دین اسلام میں نکاح کو آسان بنانے کا حکم ہے اس لیے اس پر عمل پیرا ہونے کی ضرورت ہے اور عوام سے بھی اپیل کی ہے کہ شادیوں میں فضول خرچی نہ کریں اور سنت رسول اللہ صل اللہ علیہ وسلم پر عمل کرتے ہوئے سادگی سے نکاح کریں۔