عثمانیہ اسپتال میں بارش کا پانی جمع ہونے سے مریض پریشان

شہر حیدرآباد کے قدیم عثمانیہ اسپتال میں بارش کا پانی جمع ہونے کی وجہ سے مریض اور ان کی تیمارداری کرنے والے لوگوں کو کافی زیادہ پریشانیوں کا سامنا کرنا پڑ رہا ہے۔

ریاست تلنگانہ کے شہر حیدرآباد کے قدیم عثمانیہ اسپتال کی خراب حالت اس وقت ظاہر ہونے لگی جب چند منٹوں کی بارش کی وجہ سے اسپتال میں کافی زیادہ پانی جمع ہوگیا۔

موسم برسات میں مریض اسپتال میں محفوظ نہیں ہے چند منٹوں کی بارش میں دوا خانہ کے اندرونی حصہ میں پانی داخل ہوگیا جس کی سطح دو فٹ سے زائد تھی۔

اسپتال میں پانی جمع ہونے کی وجہ سے مریض اور ان کی تیمارداری کرنے والے لوگوں کو کافی زیادہ دشواریوں کا سامنا کرنا پڑ رہا ہے۔

اسپتال سے پانی کی بہتر نکاسی نہ ہونے کی وجہ سے ملازمین وائپر سے ہی پانی نکالنے کی کوشش کررہے ہیں جس سے صاف ظاہر ہوتا ہے کہ اسپتال میں انتظامیہ کی جانب سے کوئی خاص اور بہتر انتظام نہیں ہے۔

عثمانیہ اسپتال 1500 بستروں پر مشتمل ہے جہاں علاج کے لیے ریاست اور بیرون ریاست سے مریض آتے ہیں۔

واضح رہے کہ حکومت نے اس بلڈنگ کو منہدم کرنے کا فیصلہ کیا تھا لیکن دکن ہریٹیج سوسائٹی اور دیگر سیاسی سماجی لوگوں نے حکومت کے اس منصوبہ کو ناکام کر دیا تھا۔