تلنگانہ آرٹی سی کے متعدد ورکرس ملازمت سے رجوع

تقریبا ایک ماہ سے ہڑتال کرنے والے تلنگانہ آرٹی سی کے کئی ورکرس ملازمت پر رجوع بہ کار ہوگئے۔

ہفتے کے روز منعقدہ ریاستی کابینہ کے اجلاس کے بعد میڈیا سے بات کرتے ہوئے وزیراعلی کے چندرشیکھرراو نے ہڑتالی ملازمین سے ملازمت پر رجوع بہ کار ہونے کی اپیل کی تھی جس کے لیے انہوں نے منگل تک کی مہلت دی تھی اور کہاتھا کہ منگل کی شب تک ملازمت سے رجوع ہونے والے ملازمین کا مستقبل بہتر ہوگا،یونین کے فیصلہ کے ساتھ جانے والے اپنی زندگی اور خاندان کو تباہ کرلیں گے۔اگر منگل تک ملازمت سے ہڑتالی ملازمین رجوع نہیں ہوں گے تو ان کو دوبارہ ملازمت پر نہیں لیاجائے گا۔وزیراعلی کی اس اپیل کے بعد اپنے مستقبل کے تعلق سے فکر مند کئی ہڑتالی ملازمین ملازمت سے رجوع ہوگئے۔
ریاست کے کئی بس اسٹینڈس میں بڑی تعداد میں ہڑتالی ملازمین کو ملازمت پر رجوع ہوتے ہوئے دیکھا گیا۔بھدراچلم،اُپل،کاماریڈی،حیات نگر،دلسکھ نگر،محبوب نگر،سدی پیٹ،سرسلہ،کریم نگر،پداپلی،وقارآباد ڈپوز کے آرٹی سی ورکرس ملازمت پررجوع ہوگئے۔
اسی دوران پولیس نے انتباہ دیا کہ ان ملازمت سے رجوع ہونے والے ورکرس کو اگر یونین کی جانب سے دھمکایاگیا تو دھمکی دینے والوں کے خلاف سخت کارروائی کی جائے گی۔اُپل ڈپو کے اسسٹنٹ ڈپو منیجر کے طورپرخدمات انجام دینے والے کیشوکرشنا بھی دوبارہ رجوع ہوگئے۔اس سلسلہ میں انہوں نے اتوار کو ڈپو منیجر کو ملازمت سے رجوع ہونے کا مکتوب حوالے کیا جس میں انہوں نے واضح کیا کہ تلنگانہ حکومت کی اپیل پر ردعمل ظاہر کرتے ہوئے وہ ملازمت سے رجوع ہورہے ہیں۔