ُحیدرآباد: پٹرولیم اشیا کی قیمتوں میں اضافہ، یوتھ کانگریس کا احتجاج

پٹرولیم اشیا کی قیمتوں میں اضافہ کے خلاف تلنگانہ یوتھ کانگریس کی جانب سے انوکھا احتجاج کیا گیا۔

یوتھ کانگریس کے کارکنوں نے شہر حیدرآباد میں پارٹی کے ہیڈکوارٹر گاندھی بھون سے نامپلی مین روڈ تک کار کو رسی سے کھینچ کر یہ انوکھا احتجاج کیا۔ اس موقع پر یوتھ کانگریس کے لیڈر شیوا ریڈی نے کہا کہ ملک میں پٹرولیم اشیا کی قیمتوں میں بھاری اضافہ کی ماضی میں نظیر نہیں ملتی۔

انہوں نے کہا کہ کانگریس کے 60 سالہ دور حکومت میں 60 روپئے پٹرول تھا تاہم بی جے پی کے7 سالہ دور میں پٹرول کی قیمت 100روپئے سے تجاوز کرگئی۔

انہوں نے کہا کہ پٹرول اور ڈیزل کی قیمتوں میں اضافہ کا اثر ضروری اشیا پر پڑاجو مہنگی ہوگئی ہیں۔ یہاں تک کہ ٹرانسپورٹ کے چارجز بھی اس اضافہ کے سبب بڑھ گئے۔ ریاستی حکومت کو چاہئے کہ پٹرول اور ڈیزل کی قیمتوں پر ریاستی ٹیکس کو کم کرے۔ انہوں نے کہاکہ پٹرولیم اشیا کی قیمتوں میں کمی تک یہ احتجاج یوتھ کانگریس جاری رکھے گی۔

یو این آئی