حیدرآباد: حمایت ساگر کے دو دروازوں کو کھول دیا گیا

ریاست تلنگانہ میں شدید بارشوں کا سلسلہ جاری ہے، حیدرآباد اور نواحی علاقوں میں بارشوں کے سبب عام زندگی مفلوج ہو کر رہ گئی ہے۔

شہر حیدرآباد اور نواحی علاقوں میں شدید بارشوں کے سب جہاں عام زندگی مفلوج ہو کر رہ گئی ہے وہیں آبی ذخائر میں بھی پانی کی سطح کافی بڑھ گئی ہے۔

گزشتہ شام حمایت ساگر کے دو دروازوں کو کھول دیا گیا۔ محکمہ موسمیات کے مطابق گزشتہ روز حیدرآباد میں 17.11 ملی میٹر بارش ریکارڈ کی گئی۔ سب سے زیادہ بارش نواحی علاقہ کاپرا میں درج کی گئی ہے۔

حیدرآباد کے حمایت ساگر اور عثمان ساگر کے تالاب پانی سے بھر چکے ہیں، جس کے پیش نظر انتظامیہ نے حمایت ساگر کے دو دروازوں کو کھولنے کا فیصلہ کیا۔

قابل ذکر ہے کہ حمایت ساگر میر عثمان علی خان بہادر کے وزیر نواب حمایت جنگ بہادر نے تعمیر کروایا تھا۔ عثمان ساگر اور حمایت ساگر شہر حیدرآباد کے لوگوں کی پانی کی ضرورت کو پورا کرتے ہیں۔