حیدرآباد: مانسون کی آمد، موسمی بیماریوں میں اضافہ

عالمی وبا کورونا وائرس کے پھیلاؤ سے عوام میں خوف کا ماحول پایا جارہا ہے، لوگ موسمی بیماریوں سے بھی خوف زدہ نظر آرہے ہیں۔

حیدرآباد، ان دنوں موسمی بیماریوں کی زد میں ہیں۔ پہلے ہی کورونا سے خوفزدہ عوام اب ان بیماریوں سے پریشان ہیں۔ نزلہ، کھانسی، بخار جیسی علامات انہیں ذہنی تناؤ میں مبتلا کر رہی ہیں۔ عوام اس وجہ سے ہسپتال جانے سے گریز کررہے ہیں کہ کہیں انہیں کورونا کی جانچ کروانے کے لیے نہ کہا جائے۔ شدید تکلیف پر ہی عوام کلینک کی جانب رجوع کررہے ہیں۔

پرانے شہر میں صفائی کے ناقص انتظامات اور آلودہ پانی موسمی امراض کی اہم وجوہات بن رہی ہے، جگہ جگہ کچرے کے ڈھیر ہیں اور پینے کا پانی بھی آلودہ ہے جس کے باعث عوام پانی خرید کر پینے پر مجبور ہیں۔

ڈاکٹر کے مطابق موسم باراں میں موسمی امراض عام بات ہے لیکن ریاست میں چند ماہ سے جاری کورونا کی وجہ سے عوام ذہنی الجھن میں ہیں۔

ڈاکٹر سید نعمان حسن رضوی نے ای ٹی وی بھارت کے ساتھ بات چیت کرتے ہوئے کہا کہ' کورونا وائرس کی علامات موسمی امراض سے مشابہت رکھتی ہیں اس لیے ڈاکٹرز تذبذب کا شکار تھے اور عوام کو کورونا کی جانچ کی صلاح دیتے رہتے تھے لیکن اب حکومت کی طرف سے ہدایت جاری کرنے کے بعد اب عوام کو معمول کے طرز پر علاج و معالجہ کیا جارہا ہے۔ انہوں نے عوام سے معمولی علامات سے خوفزدہ نہ ہونے کی اپیل کی۔