تیلنگانہ کے دارالحکومت حیدرآباد کے گاندھی اسپتال کے کووڈ 19 وارڈ سے چار قیدی فرار ہوگئے۔ پولیس کے مطابق چاروں قیدیوں میں کووڈ 19 کی علامات پائی گئی تھیں جس کے بعد ان کو گاندھی اسپتال منتقل کیا گیا تھا تاہم اسپتال کی دوسری منزل کے باتھ روم کی کھڑکی کی سلاخوں کو نکالتے ہوئے یہ قیدی فرار ہونے میں کامیاب رہے۔
اسپتال انتظامیہ کی شکایت کے بعد چلکل گوڑہ پولیس وہاں پہنچی جس نے اسپتال کے مختلف شعبہ جات اور وارڈس کا معائنہ کیا تاکہ یہ پتہ چلایا جاسکے کہ یہ قیدی اسپتال میں چھپے ہوئے تو نہیں ہیں۔ ڈی سی پی نارتھ زون کملیشور شنگانیور نے کہا کہ تمام پولیس اسٹیشنوں کو اس سلسلہ میں چوکس کر دیا گیا ہے۔