سڑک حادثے میں پانچ افراد ہلاک

تلنگانہ کے ضلع کریم نگر میں پیش آئے سڑک حادثہ میں ایک ہی خاندان کے پانچ افراد ہلاک ہوگئے۔

یہ حادثہ ضلع کریم نگر کے گنگادھرمنڈل کے کُرکیال علاقہ کے قریب اُس وقت پیش آیا جب گرینائیٹ سے لدی لاری نے مخالف سمت سے آنے والے آٹو کو ٹکر دے دی۔
حادثہ اتنا شدید تھا کہ چار افراد موقع پر ہی ہلاک ہوگئے جبکہ ایک شخص کی علاج کے دوران ہسپتال میں موت ہوگئی۔
مہلوکین کی شناخت ایم نرسیا،ان کے بیٹے بابو،بھائی بانیا،بھتیجہ شیکھر اور بھانجہ و آٹورکشاڈرائیور جی انجیا کے طورپر کی گئی ہے۔ کوڈمیال منڈل کے پدور سے تعلق رکھنے والے یہ افراد بابو کے علاج کے لئے آئے تھے جو گاوں آنے کے دوران حال ہی میں بائیک حادثہ میں زخمی ہوگیا تھا۔
گرینائیٹ سے لدی لاری گنگادھر علاقہ سے کریم نگر کی سمت جارہی تھی کہ اس نے آٹو کو ٹکردے دی۔انجیا،گاڑی کے سامنے کے حصہ کے کیبن میں پھنس گیا۔پولیس کو انجیا کی لاش کو نکالنے کے لئے کافی جدوجہد کرنی پڑی۔
حادثہ کا مقام دلخراش منظرپیش کررہا تھا۔اطلاع ملتے ہی چپہ ڈنڈی کے رکن اسمبلی روی شنکر نے مہلوکین کے خاندان سے تعزیت کا اظہارکیا۔ایک اور حادثہ میں ایک شخص جس کی شناخت صدام کے طورپر کی گئی ہے،ہلاک اور دیگر تین افراد زخمی ہوگئے۔یہ حادثہ اُس وقت پیش آیا جب شنکرم پیٹ منڈل کے مُولنگور علاقہ کے قریب گرینائیٹ سے لدی ٹپر نے آٹو کو ٹکر دے دی۔

سڑک حادثات سے بچنے کے لیے تیز رفتاری سے پرہیز کرنا اور ٹرافک قوانین پر عمل کرنے کے کہا جاتا ہے، جس سے حادثات سے بچا جاسکتا ہے۔