تلنگانہ: سڑک حادثہ میں خاتون سمیت پانچ افراد ہلاک

اس خوفناک حادثہ کی وجہ شدید کہرا سمجھا جا رہا ہے۔ یہ حادثہ اتنا خطرناک تھا کہ چار افراد موقع پر ہی ہلاک ہوگئے جبکہ ایک کی اسپتال منتقلی کے دوران موت ہوگئی۔

تلنگانہ کے ضلع وقارآباد میں پیش آئے سڑک حادثہ میں پانچ افراد بشمول خاتون ہلاک ہوگئے۔ یہ حادثہ ہفتہ کی صبح کی اولین ساعتوں میں اُس وقت پیش آیا جب تیز رفتار لاری نے ضلع کے ازرا چٹم پلی گاؤں میں سڑک کے کنارے ٹہرے ہوئے آٹو کو ٹکر مار دی۔

اس خوفناک حادثہ کی وجہ شدید کہرا سمجھا جا رہا ہے۔ یہ حادثہ اتنا خطرناک تھا کہ چار افراد موقع پر ہی ہلاک ہوگئے جبکہ ایک کی اسپتال منتقلی کے دوران موت ہوگئی۔ تمام مہلوکین شنکرپلی میں کپاس کے کھیتوں میں کام کرنے کیلئے جارہے تھے اور اپنے دیگر ساتھیوں کے منتظر تھے کہ اچانک تیز رفتار لاری نے آٹو کو ٹکر دے دی۔

عینی شاہدین نے بتایا کہ آر ٹی سی بس مخالف سمت سے آنے کے دوران سڑک پر رک گئی جبکہ سڑک کے دوسری طرف آٹو ٹھہری ہوئی تھی۔ اسی سمت سے آنے والی لاری نے آٹو کو ٹکر دے دی جس کے نتیجہ میں چار افراد موقع پر ہی ہلاک ہوگئے۔

مرنے والوں کی شناخت 55 سالہ شیشا بابو، 18 سالہ سندئیا، 15 سالہ نتن اور 15 سالہ سائی بابو کے طور پر کی گئی ہے جبکہ خاتون کی شناخت ہنوز نہیں ہوپائی ہے۔

اطلاع ملتے ہی پولیس وہاں پہنچی جس نے لاشوں کو پوسٹ مارٹم کے لئے روانہ کردیا۔ پولیس نے اس سلسلہ میں ایک معاملہ درج کر کے جانچ شروع کردی۔ حادثہ کا مقام دلخراش منظر پیش کررہا تھا۔ گزشتہ تین تا چاردنوں کے دوران تلنگانہ میں شدید کہرا دیکھا جا رہا ہے جس کے نتیجہ میں صبح کے اوقات میں گاڑیاں چلانا مشکل نظر آرہا ہے۔

(یو این آئی)