مگرمچھ کے حملے میں کسان ہلاک

تلنگانہ کے نارائن پیٹ ضلع میں دریائے کرشنا میں مگرمچھ نے ایک کسان کو ہلاک کردیا۔ یہ واقعہ ضلع کے مگانور منڈل کے منڈی پلی گاوں میں پیش آیا۔

پولیس کے مطابق گاؤں کے سرپنچ کی جانب سے کیے گئے 100 نمبر پر فون کے بعد پولیس اس گاوں پہنچی۔ دیہاتیوں نے پولیس کو بتایا کہ مگرمچھ نے پی بُگپا کو ہلاک کردیا۔ پولیس نے بتایا کہ دن میں کھیت میں کام کرنے کے بعد یہ کسان گھر واپس جاتا تھا تاہم بدھ کی شام تک وہ گھر واپس نہیں پہنچا۔

دیہاتیوں نے اس کی لاش دریا کے کنارے دیکھی۔ نارائن پیٹ کے انچارج ڈی ایف او گنگی ریڈی نے کہا کہ فاریسٹ رینج آفیسر اور دیگر عہدیدار جائے واردات پر پہنچ گئے، جو اس معاملہ کی جانچ کررہے ہیں۔ انہوں نے کہاکہ محکمہ جنگلات نے مگرمچھوں کو کھیت سے نکالا۔