سینکڑوں افراد کی جان لینا والا یہ مرض سنگین نوعیت اختیار کرتا جارہا ہے۔ اٹلی سے دہلی پہنچے ایک شخص میں کورونا وائرس کی علامتیں پائی گئی ہیں، اسی طرح دوبئی سے حیدرآباد پہنچے شخص میں اس مرض کی علامتوں کے پائے جانے کی اطلاع ہے۔
ان دو مریضوں کو خصوصی نگہداشت اور علاحدہ وارڈز میں رکھا گیا ہے، تاہم دونوں کی صحت ٹھیک بتائی گئی ہے۔
واضح رہے کہ اٹلی میں کورونا وائرس کے بڑھتے ہوئے انفیکشن کی وجہ سے فضائی خدمات فراہم کرانے والی بین الاقوامی کمپنیز نے اپنی پروازیں منسوخ کرنا شروع کردی ہیں۔
رعایتی ہوائی ایئر لائنز ایزی جیٹ نے کہا کہ اس نے کورونا وائرس کے انفیکشن کے پیش نظر شمالی اٹلی جانے والی اپنی پروازیں منسوخ کردی ہیں۔ اس قبل برٹش ایئرویز اور وج ایئر اور دیگر رعایتی ایئر لائنز کمپنیز نے اٹلی جانے والی پروازیں منسوخ کرنے کا اعلان کیا تھا۔
کورونا وائرس کا خطرہ محض چین تک محدود نہیں بلکہ یہ عالمی سطح پر بھی اس وائرس کا خطرہ بنا ہوا ہے۔ كورونا وائرس کے خطرے کو دیکھتے ہوئے مغربی ایشیائی ممالک سے سفر کرنے والوں پر نگرانی رکھی جا رہی ہے۔
وائرس کے اس خطرے سے بچنے کے لیے سعودی عرب نے اب خاص طور پر مغربی ایشیائی ممالک سے آنے والے عمرہ زائرین پر پابندی لگا دی ہے۔ سعودی عرب میں داخل ہونے پر لگی اس پابندی سے بھارت کے عمرہ زائرین پر بھی اثر پڑا ہے۔سعودی حکومت کے اس فیصلے کے بعد دو روز قبل میرٹھ سے عمرہ سفر پر گئے ایک قافلے میں شامل زائرین کے اہل خانہ بھی پریشان ہوئے اور اب آئندہ تاریخوں میں جانے والے قافلے کے منتظمین اور زائرین بھی پریشان ہیں۔
