حیدرآباد میں بے قابو کار فلائی اوور سے گری، ایک ہلاک

حیدرآباد میں ایک اور کار کے فلائی اوور سے گرنے کا واقعہ پیش آیا ہے۔ صنعت نگر پولیس اسٹیشن کے حدود میں موسی پیٹ فلائی اوور سے پیر کی رات دو بجے ایک تیز رفتار کار بے قابو ہوکر فلائی اوور سے نیچے گر پڑی، جس کے نتیجے میں ایک نو جوان کی موقع پر موت ہو گئی جبکہ دیگر چار کو زخمی حالت میں گاندھی ہسپتال منتقل کیا گیا۔

تفصیلات کے مطابق بورا بنڈہ کے پانچ نوجوان سنیل، سہیل، اشفاق، غوث اور عرفان رات دیر گئے کار سے گھر واپس ہو رہے تھے۔ پولیسں کے مطابق سنیل نامی شخص گاڑی چلا رہا تھا، اس نے کار کی رفتار بڑھا دی جس کے باعث کار بے قابو ہوگئی اور توازن بڑھنے کی وجہ سے کار فلائی اوور سے نیچے گر پڑی۔ اس حادثے میں سہیل نامی شخص کی موقع پر ہی موت ہوگئی۔ جبکہ چاروں نوجوانوں کو زخمی حالت میں ہسپتال منتقل کیا گیا۔

تین ماہ میں فلائی اوور سے کار گرنے کا یہ دوسرا واقعہ ہے اس سے قبل گچی باؤلی میں واقع فلائی اوور سے ایک بے قابو کار کے گرنے سے ایک راہ گیر خاتون کی موت واقع ہوئی تھی۔ صنعت نگر پولیس اس واقعے کے مزید حقائق کی تحقیق میں مصروف ہے۔