بازار بند کرانے کو لیکر وزیر اعلی کو میمورنڈم

ریاست ہریانہ کے ضلع نوح کے اورنج زون میں شامل ہونے کے بعد بازار کھولے جا چکے ہیں۔ ضلع میں کورونا وائرس پر کافی حد تک لگام لگ چکی ہے۔ تاہم ریاست ہریانہ میں کورونا وائرس کے متاثرین ہنوز بڑھ رہے ہیں۔

اس اندیشے کے پیش نظر میواتی عوام ابھی بازاروں کو بند رکھنے کے حق میں ہے تاکہ ممکنہ خدشات سے محفوظ رہا جا سکے۔ اب اس معاملے میں جمعیۃ علماء میوات یونٹ اور میوات کے سماجی کارکنان نے وزیر اعلیٰ ہریانہ منوہر لال کھٹر کے نام میمورنڈم نھیجا ہے اور بازار بند کرنے کی اپیل کی ہے۔

جمعیۃ علماء میوات یونٹ سکریٹری مولانا صابر قاسمی نے ای ٹی وی بھارت سے بات کرتے ہوئے کہا کہ کورونا وائرس ایک خطرناک بیماری ہے۔ اگر اس طرح بازار کھلے رہتے ہیں تو یہ ٹھیک نہیں ہوگا۔ انہوں نے کہا کہ اسی معاملے میں بازار بند رکھنے کے مطالبہ کو لے کر ضلع مجسٹریٹ پنکج کی معرفت وزیر اعلی ہریانہ کو میمورنڈم سونپا گیا ہے۔

سماجی کارکن ڈاکٹر ارشد اڈبر نے کہا کہ اگر کورونا وائرس پھیلتا ہے تو اس کی ذمہ داری حکومت اور انتظامیہ کی ہوگی نا کہ عوام کی۔ ہمارا علاقہ پسماندہ ہے، بیداری کی کمی ہے، بڑی مشکل سے لوگ کورونا کے تئیں بیدار اور فکر مند ہوئے ہیں۔ابھی بازار بند رہنے چاہیے۔