گیا میں کورونا کے مثبت کیسز میں اضافے کے بعد سختی سے گائیڈ لائنز پر عمل درآمد کرانے کے قواعد تیز کرنے کی ہدایت دی گئی ہے۔ ڈسٹرکٹ مجسٹریٹ ابھشیک کمار سنگھ نے گیا ریلوے اسٹیشن پر پہنچ کر انتظامات کا جائزہ لیا۔
ریلوے اسٹیشن کے مینیجر سمیت سبھی حکام و ملازمین کو محتاط رہنے کی ہدایت دی ہے۔ خاص طور پر مہاراشٹر، مدھیہ پردیش، کیرالہ سمیت ان تمام ریاستوں سے آنے والے مسافروں کی کورونا جانچ کی ہدایت دی ہے، جن ریاستوں میں کورونا کے پوزیٹیو کیسز میں اضافے ہوئے ہیں۔ گیا اسٹیشن پر جانچ میں روزانہ پوزیٹیو معاملے سامنے آرہے ہیں، گزشتہ تین دنوں میں کورونا ٹیسٹ رپورٹ میں دس مسافروں کی رپورٹ پوزیٹیو آئی ہے۔ یہاں پر سوشل ڈسٹینسنگ اور ماسک لگانے کو لیکر نہ تو مسافر محتاط ہیں اور نہ ہی ریلوے انتظامیہ محتاط ہے۔
ڈسٹرکٹ مجسٹریٹ ابھشیک کمار سنگھ نے کہا کہ وزیر اعلیٰ نتیش کمار نے ہجوم والے مقامات پر کیے گئے انتظامات کے جائزہ لینے کی ہدایت دی ہے۔ اسی تعلق سے گیا ریلوے اسٹیشن کا جائزہ لیا گیا ہے۔ اسٹیشن پر بہتر انتظامات ہونے کا دعویٰ کرتے ہوئے انہوں نے کہا کہ دوسری ریاستوں سے آنے والے مسافروں کا اسٹیشن پر ہی کورونا کا ٹیسٹ کرایا جارہا ہے۔ جن کی رپورٹ پوزیٹیو آتی ہے اور انہیں کورونا کے علامات ظاہر ہیں، تو انہیں سیدھے ہسپتال بھیجا جارہا ہے۔ جنکی رپورٹ مثبت ہے تاہم ان میں کورونا کے علامت ظاہر نہیں ہیں ویسے لوگوں کو ایمبولینس سے انہیں ان کے مقام تک بھیج کر قرنطینہ میں رکھا جا رہا ہے۔
انہوں نے کہا کہ ہولی تہوار کو لیکر انتظامیہ محتاط ہے۔ اس لیے بس اسٹینڈ، ریلوے اسٹیشن، ایئرپورٹ پر سختی سے جانچ کی جارہی ہے۔ جانچ کے لیے اضافی کاؤنٹر کھولے گئے ہیں۔ گیا اسٹیشن پر روزانہ قریب چھ سو لوگوں کا ٹیسٹ ہورہا ہے۔ انہوں نے بھی کہا کہ جس طرح سے کیسز بڑھے ہیں، اس سے یہ انکار نہیں کیا جاسکتا ہے کہ گیا میں مثبت کیسز نہیں بڑھیں گے، اس لیے سبھی کو محتاط رہنے کی ضرورت ہے۔
