ریاست بہار کے ضلع گیا ریلوے جنکشن کے باہری احاطہ میں واقع نیم درخت کے نیچے مندر کا حصہ منہدم ہونے پر مشتعل افراد نے ٹائر جلا کر احتجاج کیا۔
مشتعل عوام نے ریلوے انتظامیہ اور ضلع انتظامیہ کے خلاف ناراضگی کااظہار کرتے ہوئے نعرے بازی بھی کی۔
ضلع انتظامیہ اور ریلوے انتظامیہ نے امن و امان کو برقرار رکنے کے لیے جی آرپی، آرپی ایف اور کوتوالی تھانہ کی پولیس وافسران کو جائے وقوع پر تعینات کیا ہوا تھا۔
بتایا جارہا ہے کہ پیر کی رات کو کسی نے مندر کے حصے کو توڑ دیاجس سے ایک طبقے کے جذبات مجروح ہوئے ہیں۔
ریلوے ڈی ایس پی سنیل کمار کی قیادت میں ریلوے انسپکٹر رنجیت کمار ، ریلوے تھانہ انچارج کے کے سنگھ ، کوتوالی تھانہ کے سب انسپکٹر ایودھیاپرساد نے ہنگامہ کررہے لوگوں کو سمجھا کر معاملے کو ٹھندا کر دیا ہے لیکن مشتعل افراد مندر کے توڑنے والوں کے خلاف کارروائی کرنے اور ٹوٹے ہوئے حصے کو دوبارہ تعمیر کرائے جانے کامطالبہ کیا۔
بتایاجارہا ہے کہ ریلوے احاطہ کو وسیع کرنے کے لیے کچھ حصے کو منہدم کیا گیا تھا ڈی ایس پی سنیل کمار نے لوگوں کو یقین دہانی کراکر شانت کرایا ہے اور مندر کی تعمیری کام بھی شروع کرادیا گیاہے۔
