'ریاستی وزیر کا دعوی، ترقیاتی کام زمینی حقائق پر مبنی ہے'

گیا شہری حلقہ سے آٹھویں مرتبہ بی جے پی کے امیدوار وریاستی وزیر پریم کمار نے دعویٰ کیا کہ انہوں نے ترقیاتی کاموں کاجال بچھایا ہے۔ کانگریس کی طرف سے مسلسل وزیر پرکام نہیں کرنے کاالزام لگایا جاتا رہا ہے ۔

گیا شہری حلقہ سے آٹھویں مرتبہ بی جے پی کے امیدوار وریاستی وزیر پریم کمار نے ای ٹی وی بھارت اردو سے خصوصی بات چیت میں کہا کہ انکی حکومت نے ترقیاتی کاموں کو زمینی سطح پرکیا ہے، سڑکوں کے جال بچھائے گئے، گھرگھرتک 'نل جل منصوبہ'کے تحت پائپ لائن کے ذریعے پانی پہنچایا گیا ہے، شہر کی خوبصورتی اور صاف ستھرا کرنے کی غرض سے پارک و تالابوں کی تزئین ورنگ روغن کے کام کرائے گئے ہیں'۔

ماحولیاتی آلودگی سے شہر کو بچانے اور پانی کے تحفظ کی غرض سے 'جل جیون ہریالی' منصوبہ کے تحت شہر میں بیس لاکھ سے زائد پودے لگائے گئے ہیں۔

انہوں نے کانگریس کے امیدوار پر الزام عائدکرتے ہوئے کہا کہ وہ صرف عوام کو گمراہ کر رہے ہیں کہ انکی حکومت کا انکے ذریعے ترقیاتی کام نہیں ہوئے ہیں۔ کام دیکھنے کی چیز ہے اسے چھپایا نہیں جاسکتا'۔

انہوں نے اقلیتی طبقے کے لیے حکومت کے ذریعہ کیے گئے کاموں کا بھی تذکرہ کیا اور کہا کہ انکی ریاستی ومرکزی حکومت نے دیکھاوا نہیں کیا ہے بلکہ اقلیتی طبقے کی فلاح کے کام کئے ہیں۔ گیا میں معاشرتی مسائل کو اجاگر کرکے اسکا حل نکالا گیا ہے۔ انہوں نے کہا کہ کچھ سڑکیں جو شہر میں نہیں بن پائی ہیں اسکے ذمے دار موجودہ کانگریس کے امیدوار و ڈپٹی میئر ہیں کیونکہ میونسپل کی طرف سے این اوسی نہیں ملی تھی۔

واضح رہے کہ ڈاکٹر پریم کمار قریب تیس سالوں سے گیا شہری حلقہ سے رکن اسمبلی ہیں۔ ایک بار پھر بی جے پی نے ان پر بھروسہ کرتے ہوئے امیدوار بنایاہے تاہم اس بار پریم کمار کی راہ آسان نہیں ہے کیونکہ کانگریس کی طرف سے موجودہ ڈپٹی میئر موہن شریواستو انکے مدمقابل کھڑے ہیں۔

خیال رہے کہ بہار اسمبلی انتخابات 2020 کی تاریخوں کا اعلان ہوچکا ہے۔ تین مرحلے میں انتخابات ہونے ہیں، پہلے مرحلے میں 71 سیٹوں پر 28 اکتوبر کو ووٹنگ ہونی ہے، جبکہ دوسرے مرحلے میں 91 سیٹوں کے لیے 3 نومبر کو ووٹنگ ہونی ہے اور تیسرے مرحلے میں 78 سیٹوں کے لیے 7 نومبر کو ووٹنگ ہونی ہے۔ جبکہ 10 نومبر کو نتائج کا اعلان ہونا ہے۔