حیدرآباد میں یکم جنوری سے کل ہند صنعتی نمائش

شہر حیدرآباد میں یکم جنوری سے کل ہند صنعتی نمائش کا آغاز ہوگا جس کے لئے تیاریاں تیزی سے جاری ہیں۔

نامپلی میں واقع نمائش گراونڈ میں اس خصوص میں سرگرمیاں تیز ہوگئی ہیں جہاں اسٹالس نصب کرنے کے ساتھ ساتھ دیگر کام انجام دیئے جارہے ہیں۔یہ 46روزہ نمائش 15فروری تک جاری رہے گی۔اسٹالس کی تیاری کے ساتھ اس نمائش کو اس مرتبہ کافی دلچسپ بنانے کے انتظامات کئے جارہے ہیں۔توقع ہے کہ جاریہ سال تقریبا 25لاکھ افراد اس نمائش کا مشاہدہ کریں گے۔اس سال ہونے والی 80ویں نمائش کے لئے موضوع”معاشی تفویض اختیارات،انٹرپرینرشپ اورتعلیم“دیاگیا ہے۔گزشتہ سال نمائش میں ہوئے بڑے پیمانہ پر آگ لگنے کے واقعہ کے پیش نظر بہتر سیکوریٹی انتظامات کئے جارہے ہیں اور اس بات کویقینی بنایا جارہا ہے کہ آگ لگنے کی صورت میں فائر بریگیڈس اور یہاں آنے والوں کے لئے آسانی کے ساتھ جگہ فراہم کی جاسکے۔عہدیداروں کے ایک وفد نے پہلے ہی اس خصوص میں معائنے کئے اور کسی بھی ہنگامی صورتحال پر یہاں سے لوگوں کو نکالنے کے سلسلہ میں تفصیلی منصوبہ تیار کیا۔ہر سال اس نمائش میں ہندوستان کے مختلف علاقوں سے لوگ آکر اپنے اسٹالس لگاتے ہیں۔